ئەو دوکەڵەی لە ئاسمانی هەولێر دەبینرێت هاوڵاتییان دروستیان کردووە

SNN-

فەرمانگەی ژینگەی هەولێر، ڕایگەیاند، بەشێک لە هاوڵاتیان تایە و وایەرى کارەبا و خاشاكى كۆكراوه‌ ده‌سوتێنن و ئه‌م دوكه‌ڵه‌یان دروستكردووه‌.

فەرمانگەی ژینگه‌ى هه‌ولێر به‌دواداچوونى بۆ ئه‌و دووكه‌ڵه‌ كرد كه‌ رۆژانه‌ له‌ سنوورى بنه‌سڵاوه‌ ده‌بیندرێت بۆیان ده‌ركه‌وت، هاوڵاتیان ئه‌م كاره‌ ده‌كه‌ن و لایه‌نه‌ په‌یوه‌ندیداره‌كانیشیان ئاگادار كرده‌وه‌.

دلشاد حسێن هیرانى، بەرێوەبەرى فەرمانگەى ژینگەى هەولێر، ڕایگەیاند، بەشێک لە هاوڵاتیان تایە و وایەرى کارەبا و خاشاكى كۆكراوه‌ ده‌سوتێنن و ئه‌م دوكه‌ڵه‌یان دروستكردووه‌، شوێنى دروستبوونى ئه‌م دوكه‌ڵه‌ كه‌وتووه‌ نێوان بنه‌سڵاوه‌ و داره‌توو و پاركی هه‌وار.

ئاماژه‌ى به‌وه‌شكردووە، هه‌ردوو لایه‌نى ئاسایش و شاره‌وانیان ئاگاداركردووه‌ته‌وه‌ كه‌ هاوكاریان بن بۆ كۆتایی هێنان به‌م دوكه‌ڵه‌ كه‌ كاریگه‌رى له‌سه‌ر به‌شێكی ژینگه‌ى هه‌ولێر دروستكردووه‌.

به‌پێی رێنماییه‌كانى ده‌سته‌ى پاراستنى ژینگه‌، هه‌ركه‌سێك ئه‌و كاره‌ بكات سەرپێچی ژینگەییه‌ و لە یاسایی ژمارە (8ـی ساڵی 2008) له‌ مادەی (42) لەیاسای پاراستن و چاککردنی ژینگە دیاری كراوه‌ و سزاشی بۆ داندراوه‌، به‌پێی ماده‌كه‌، هه‌ر كه‌سێك ئه‌م جۆره‌ سه‌رپێچییانه‌ ئه‌نجام بدات، سزاكه‌ى بە بەندکردن یان سزای پێبژاردن ده‌بێت، کە لە 150 هەزار کەمترنەبێت و لە 200 ملیۆن دیناریش زیاتر نەبێت