لەترسی هاتنی زۆرترین مامۆستا بۆ هەولێر پارتی ڕێكاری توندی گرتووەتەبەر لە بازگەكان
SNN-عەلی حەمە سەعید
وابڕیارە كە سبەی یەكشەممە مامۆستایانی ناڕازی لە سلێمانییەوە بەرەو شاری هەولێر بەرێبكەون و لەوێ ناڕەزایەتی و داواكارییەكانی خۆیان بە لایەنە پەیوەندیدارەكان بگەیەنن، بەڵام هەر لە ئەمڕۆوە پارتی بازگەكانی هاتنە ناو هەولێری توندوتۆڵكردووە.
بەگوێرەی زانیارییەكانی SNNلە ئەمڕۆ بە فەرمانێكی بەرپرسانی پارتی كە ئاراستەی سەرجەم ئەو بازگانە كراون كە سەرەتای هاتنەژورەوەن بۆ ناو هەولێر، داواكراوە ڕێوشوێنەكانیان بەرامبەر بە هەموو ئەو كەسانە توند بكەنەوە كە گوماندەكرێت بۆ مەبەستی بەشداریكردن لە خۆپیشاندانی مامۆستایان بێنە هەولێر.
ئاماژە بەوەشكراوە، ئەمڕۆ لە بازگەی سماقوڵی و بازگەكانی دیكەش داوای ناسنامە لە هەموو ئەو كەسانە دەكرێت كە بە ئۆتۆمبێلی تایبەتی خۆیان دێنە هەولێر، چونكە بەرپرسانی پارتی گومانیان هەیە پێش ئەوەی مامۆستایانی سلێمانی بەفەرمی سبەی یەكشەممە بەڕێبكەون، ئەمڕۆ بەشێك لە مامۆستایان خۆیان بگەیەننە هەولێر و سبەی خۆپیشاندا بكەن.
هەر لە زانیارییەكانی SNNئەوەشهاتووە كە بازگەكانی پارتی هەموو ئامادەكارییەكیان كردووە بۆ ئەوەی سبەی یەكشەممە ڕێگە بە و پاسانە نەدەن بچنە هەولێر كە لەلایەن خودی مامۆستایانەوە گیراون بۆ گواستنەوەی ئەو مامۆستا و فەرمانبەرانەی كە خوازریان لە هەولێر داواكاریی مامۆستایانی مانگرتوو بگەیەنن بەلایەنە پەیوەندیدارەكانی حكومەتی هەرێم.
