هەڵوێستی كۆمەڵی دادگەری لەبارەی خۆپیشاندانەكەی سبەی هەولێر

SNN-عەلی حەمەسەعید

وابڕیارە كە سبەی یەك شەممە ژمارەیەك لە مامۆستایان و فەرمانبەرانی سنوری پارێزگای سلێمانی بەرەو شاری هەولێر بەڕێبكەون بەمەبەستی گەیاندنی داواكاری مامۆستایانی مانگرتووی سلێمانی بەلایەنە پەیوەندیدارەكان، بەرپرسێكی كۆمەڵی دادگەریش جەخت لەوەدەكاتەوە كە پشتگیری لەداوكاریی مامۆستایان و فەرمانبەران دەكەین.

عومەر گوڵپی، كاندیدی دەرچوو بۆ خولی شەشەمی پەرلەمانی كوردستان لە سەر لیستی كۆمەڵی دادگەری بە SNNی ڕاگەیاند: هەڵوێستی كۆمەڵی دادگەری بەجۆرێكە كە لەهەر شوێنێك گردبوونەوە و ناڕەزایەتی هەبێت بۆ داواكردنی ماف و شایستەی دارایی فەرمانبەران و چین و توێژە جیاوازەكان بەهەموو جۆرێك پشتگیری لێدەكەین.

ئاماژەی بەوەشكرد، خۆپیشاندان مافێكی سەرەتایی هەموو تاكێكە لەبەرامبەردا ئەركی سەرشانی هیزە ئەمنییەكانیشە كە پاریزگاری لە خۆپیشاندەران بكەن و ڕێگری و گرفتیان بۆ دروست نەكەن، بەڵكوو دەبێت كارئاسانی بۆهاووڵاتیان بكەن.

ئەو كاندیدە دەرچووە بۆخولی شەشەمی پەرلەمانی كوردستان لە سەر لیستی كۆمەڵی دادگەری ئەوەشی خستەڕوو، لەهەولێر یان لە هەر شوینێك خۆپیشاندا بەڕێوەبچێت و لە پێناو بەرژەوەندی گشتی بێت ئێمە پشتگیری تەوای لێدەكەین، چونكە ئەمە مافێكی یاسایی هەر هاوولاتییەكە خۆپیشاندا بكات بۆ جێبەجێكردنی داواكارییەكانیان.