لە ترسی خۆپیشاندەرانی سلێمانی پارتی هێزی هێنایە دێگەڵە

SNN-عەلی حەمە سەعید

دوای ئەوەی ئەمڕۆ ژمارەیەك لە مامۆستایان و فەرمانبەران و چین و توێژە جیاوازەكانی سنووری پارێزگای سلێمانی بەرەو شاری هەولێر بەڕێكەوتوون بەمەبەستی ئەنجامدانی خۆپیشاندان، بەڵام بۆ ڕێگریكردن لەهاتنی ئەو مامۆستایانە پارتی هێزێكی زۆری هێناوەتە بازگەكان بەتایبەت بازگەی دێگەڵە.

بەگوێرەی زانیارییەكانی SNNلەشەوی ڕابردووەوە پارتی دەستیكردووە بە گواستنەوەی هێزەكانی لەناو سەنتەری هەولێر و دەوورووبەرییەوە بۆ ناو بازگەكانی كە دەچنە ناو هەولێر بە تایبەت بازگەی دێگەڵە، ئەوەش بەمەبەستی ڕێگریكردن لە هاتنە ناوەوەی ئەو مامۆستا و فەرمانبەرانەی كە بەنیازن بچنە هەولێر و لەبەردەم بینای نەتەوەیەكگرتووەكان خۆپیشاندان بكەن و پەیمامی مامۆستایانی مانگرتوو بە لایەنە پەیوەندیدارەكان بگەیەنن.

ئاماژە بەوەشكراوە، لە دوێنێوە سەرجەم ئەو بازگانەی كە هاووڵاتیانی لێوە دەچنە ناو هەولێر، هاتوچۆكردن تیایاندا ئەستەم بووە بەتایبەت بۆ ئەو خێزانانەی كە لە سنوری سلێمانییەوە بەرەو هەولێر دەگەڕێنەوە، هاوكات لە بازگەی دێگەڵە ڕێگە نادرێت هیچ هاووڵاتیەكی سلێمانی بچێتە هەولێر ئەگەر سەیری ناسنامەكەی نەكرێت و دڵنیا نەبنەوە كە بۆ خۆپیشاندا ناچێتە هەولێر.

هەر ئەمڕۆش ئومێد خۆشناو پارێزگاری هەولێر لە كۆنگرەیەكی ڕۆژنامەوانیدا جەختی لەوەكردەوە كە ڕێگەنادەن ئەو مامۆستا و فەرمانبەرانەی لە سلێمانییەوە هاتوون بێنە هەولێر، چونكە هەولێر تاقەتی میوانی لەو جۆرەی نییە.