سەرۆکی ئەمریکا جارێکی تر لەبارەی کڕینی غەززەوە هاتە دەنگ

SNN

دۆناڵد ترەمپ، سەرۆکی ئەمریکا بۆ جارێکی تر لە بارەی کڕینی غەززەوە رایگەیاند، پابەندم بە کڕینی غەززەوە و بەشێکی دەدەم بە رۆژهەڵاتی ناوەڕاست تاکو بونیادی بنێنەوە.

دۆناڵد ترەمپ، سەرۆکی ئەمریکا لە لێدوانێکیدا ڕایگەیاند، “پابەندم بە کڕینی غەززە” و بەشێکیشی دەداتە وڵاتانی ڕۆژهەڵاتی ناوەڕاست بۆ ئەوەی بنیادی بنێنەوە، ئەم لێدوانەی ترەمپ جارێکی تر کاردانەوەی بەدوادا هات و حەماسی هێنایە دەنگ.

ترەمپ لە لێدوانەکەیدا وتوویەتی “غەززە دەکەمە شوێنێکی نوێی پەرەپێدان و گرنگیش دەدەم بە فەڵەستینییەکان بۆ ئەوەی نەکوژرێن و مافی پەنابەرێتیان پێدەدەم”.

سەرۆکی ئەمریکا ڕاشیگەیاند، “غەززە شوینێکی عەقاریی نایابی هەیە و نابێت دەستبەرداری بین، غەززە بە وڵاتە دەوڵەمەندەکانی ڕۆژهەڵاتی ناوەڕاست ئاوەدانی دەکەینەوە”.

ئاماژەی بەوەکردووە، لە هەندێک حاڵەتی تاک و تایبەتدا ڕێگە بە پەنابەرانی فەڵەستینی دەدەن بچێتە ئەمریکاوە و ئەگەر جێگرەوەیەکی باشیش بۆ فەڵەستینییەکان دابین بکەین ئەوا ناخوازن بگەڕێنەوە بۆ غەززە.”

لەبارەی ئەم لێدوانانەی ترەمپەوە، عیزەت ڕەشق، ئەندامی مەکتەبی سیاسی بزووتنەوەی حەماس ئیدانەی کرد و وتی، “غەززە بەشێکی دانەبڕاوی فەڵەستینی داگیرکراوە و عەقارێک نییە کڕین و فرۆشتنی پێوە بکرێت.”