دادگای فیدڕاڵی بڕیار لە غەرامەی كامێراكانی هاتووچۆ و پشكنین “هەززە” دەدات

SNN

سبەینێ‌ سێ‌شەممە، دادگای باڵای فیدڕاڵی عێراق كۆدەبێتەوە لەسەر ژمارەیەك سكاڵا، كە 4 سكاڵایان تایبەتن بە هەرێمی كوردستان، كە یەكێكیان لەسەر هاوسەرگیری دووەم و یەكێكیان لەسەر وەزارەتی شەهیدان و و دووانیشیان لەسەر غەرامەی كامێراكانی تۆماركردنی تیژڕەوی هاتووچۆیە.

بەپێی خشتەی دانیشتنەكانی دادگای باڵای فیدڕاڵی، كە لە ماڵپەڕی فەرمی دادگاكە بڵاوكراوەتەوە، یەکێک لە سکاڵاکان لەسەر سەرۆکی پەرلەمانی کوردستان تۆمارکراوە و سکاڵاکار داوادەکات هەمواری یاسای باری کەسیی ژمارە 188 ساڵی 1959 کە تایبەتە بە وەرگرتنی ڕەزامەندیی هاوسەری یەکەم بۆ ئەنجامدانی هاوسەرگیری دووەم لەبەردەم دادگا بەنایاسایی بناسێنێت و ئەو هەموارە هەڵبوەشێنێتەوە.

سکاڵایەکی دیکە لەسەر سەرۆکوەزیرانی هەرێمی کوردستان و وەزیری ناوخۆ تۆمار کراوە، کە سکاڵاکار دەڵێت: وەرگرتنی باج و رسوماتەکان بەگوێرەی یاسای ژمارە 86ـی ساڵی 2004 تایبەت بە تۆماری ئۆتۆمبێل نایاساییە و وەزیری ناوخۆ دەسەڵاتی ئەوەی نییە سزاکان کەم و زیاد بکات و سزادانی شۆفیر بەهۆی خێراییەوە زیاتر لەجارێک لەیەک کات و شەقامدا نایاساییە، چونکە لەسەر یەک سەرپێچی نابێت کەسێک دووجار سزابدرێت.

لە سكاڵاكەدا هاتووە: بڕیارێک دەربكرێت، کە ئەو پارەیەی هاووڵاتیان دەیدەن بەو کۆمپانیایانەی کە پشکنین بۆ باری سەلامەتی ئۆتۆمبێل دەکەن بە نادەستووری بزانێت، هەروەها دەبێت بەڕێوەبەرایەتییەکانی هاتووچۆ لەو ڕسوماتانە بدەن کە بەپێی یاسا بەسەر هاووڵاتیاندا دەسەپێنن.

سکاڵایەکی دیکەی پەیوەست بە هەرێمی کوردستان، لەسەر سەرۆکی پەرلەمان تۆمارکراوە و سکاڵاکار دەڵێت: ناوی وەزارەتی کاروباری شەهیدان و ئەنفالکراوان نایاساییە و پێویستە بکرێتە دامەزراوەی شەهیدان و ناوی ئەنفالکراوانی لێبکرێتەوە.