نەبوونی كارەبا، دوو ڕۆژ نەشتەرگەری لە گەورەترین نەخۆشخانەی حكومی هەولێر ڕادەگرێت
SNN-عەلی حەمە سەعید
بەهۆی نەبوونی كارەبا و هاوكات بێباكی بەرپرسانی ئیدارەی نەخۆشخانە و پاریزگاری هەولێر، ماوەی دوو ڕۆژە ئەنجامدانی نەشتەرگەری لە نەخۆشخانەی ڕزگاری شاری هەولێر ڕاگیراوە، هاووڵاتیانیش ئەمە بە پلانێك دادەنێن بۆ ئەوەی نەخۆشەخان بڕۆنە نەخۆشخانە ئەهلییەكانەوە.
سەبری ئەحمەد، یەكێك لەو نەخۆشخانەی كە لە نەخۆشخانەی ڕزگاری هەولێرەوە پەیوەندی بە SNNەوە كرد و ڕایگەیاند: كە ماوەی دوو ڕۆژە بە هۆی نەبوونی كارەباوە دەستی دەستیان پێدەكرێت لە ئەنجامدانی هەموو جۆرە نەشتەرگەرییەكی گەورە و بچوك، لەكاتێكدا بەرپرسانی نەخۆشخانەكە ئەگەر مەبەستیان بێت ئەو گرفتە چارەسەر بكەن زۆر بە ئاسانی دەتوانن چارەسەری بكەن.
ئاماژەی بەوەشكرد، پارێزگاری هەولێر و لایەنە پەیوەندیدارەكانی دیكەش ئاگاری ئەو گرفتەن كە ماوەی دوو ڕۆژە كارەبا لە نەخۆشخانەی ڕزگاری بڕاوە، بەڵام بەهۆی ئەوەی كەسە نزیكەكانی خۆیان خاوەن نەخۆشخانەی ئەهلین، نایانەوێت ئەو نەخۆشخانەیە گرفتەكانی چارەسەر ببێت و نەخۆش بەناچاری بچێت لە نەخۆشخانە تایبەتەکان نەشتەرگەری بۆ بکرێت.
وتەكانی ئەو هاووڵاتییە لە كاتێكدایە كە لەناو شاری هەولێر بە سەدان نەخۆشخانەی ئەهلی هەن كە كارەبای 24 كاتژمێرییان بۆ دابینكراوە و هیچ گرفتێكیان نییە لە نەبوونی كارەبا، هاوكات بە بڕەپارەیەكی زۆر نەشتەرگەری بۆ نەخۆش ئەنجام دەدەن كە لەتوانای هەموو كەسێكدا نییە ڕوو لەنەخۆشخانانە بكات.
