نوێترین زانیاری لەبارەی شكاندنی بایكۆت و دەستپێكردنەوەی دەوامی ناوەندەكانی خوێندن

SNN-عەلی حەمە سەعید

لەگەڵ ئەوەی چەند ڕۆژێكە مانگرتنی مامۆستایان و فەرمانبەران لە سلێمانی هەڵپەسێردراوە، بەڵام بە وتەی ئەندامی ئەنجومەنی مامۆستایانی ناڕازی شكاندنی بایكۆت و دەستپێكردنەوەی دەوام پەیوەستە بە جێبەجێكردنی داواكارییەكانمان، بۆیە لە ئێستادا هیچ بریارێكی شكاندنی بایكۆت لە ئارادا نییە.

عادل حەسەن، ئەندامی ئەنجومەنی مامۆستایانی ناڕازی بە SNNی ڕاگەیاند: ئەو مانگرتنەی كە بەشێك لە مامۆستایان و فەرمانبەران دەستیان پێكردبوو پەیوەندی بە بەردەوامی بایكۆت یاخود شكاندنی بایكۆتەوە نییە و ئەو یەكیك بوو لەو چالاكییانەی كە لەڕێگەیەوە داوامان لە حكومەت كرد بۆ ئەوەی داواكارییەكانمان جیبەجێی بكات، بۆیە ئێستا كە چەند ڕۆژێكە مانگرتن هەڵپەسێردراوە ئەوە بەمانای ئەوە نایەت بایكۆت بشكێت.

ئاماژەی بەوەشكرد، شكاندنی بایكۆت پەیوەستە بە جێبەجێكردنی داواكارییەكانمانەوە كە خۆی دەبینێتەوە لە دابەشكردنی مووچەی مانگی 12 و هەروەها پلەبەرزكردنەوە و دابەشكردنی مووچەی هەموو 30 ڕۆژ جارێك، بۆ ئەوەی چیدیكە هەموو ساڵێك ئێمەی مامۆستایان و فەرمانبەران نەڕژێینە سەر شەقام و خوێندنی قوتابیانیش زیانی بەرنەكەوێت.

ئەو ئەندامەی ئەنجومەنی مامۆستایانی ناڕازی ئەوەشی خستەڕوو، ئەگەر حكومەتی هەرێم مەبەستی بیت چارەسەری گرفتی مامۆستایان بكات ئەوا دەتوانێت زۆر بە ئاسانی ئەو گرفتە چارەسەر بكات و مووچەی مانگی 12 دابەش بكات، چونكە ئێمە لەوە دڵنیاین كە داهاتی ناوخۆ هێندە هەیە كە بەشی دابەشكردنی مووچە بكات، لەگەڵ ئەوەشدا عێراق پارەی بۆ مووچەی مانگی 12 ناردووە، بەڵام هەرێم دابەشی ناكات.