سبەینێ دەستبەدابەشکردنی مووچەی مانگی 2 دەکرێت

SNN-عەلی حەمە سەعید
لەسبەینێوە وەزارەتی دارایی عێراق دەستبەكات بە تەمویلكردنی وەزارەتەكان بۆ دابەشكردنی مووچەی مانگی دووی فەرمانبەرەكانیان، هاوكات لەهەفتەی داهاتووش تەمویلی هەرێم بۆ مووچەی مانگی دوو ڕەوانە دەكرێت.

بەگوێرەی زانیارییەكانی SNN وابڕیارە لە سبەینێ 18/2/2025 وەزارەتی دارایی عێراق وەزارەت و دامەزراوەكانی دیكە ئاگادار بكاتەوە بە تەمویلكردنیان بە مەبەستی دەستكردن بەدابەشكردنی مووچەی مانگی دووی فەرمانبەرەكانیان.

ئاماژەی بەوشكرد، بەگوێرەی دواین ڕێككەوتنی هەردوو وەزارەتی دارایی لە هەرێم و عێراق، دوای دابەشكردنی مووچەی فەرمانبەرانی عێراق تەمویلكردنی وەزارەتەكانی حكومەتی هەرێمیش دەستپێدەكات، ئەوەش لەسەر بنەمای ئەو لیستەی كە بۆ مووچەی مانگی یەكی ئەمساڵ لەسەری ڕێككەوتوون.

هەر لە زانیارییەكانی SNNهاتووە، كە بڕی ئەو پارەیەی كە بۆ مووچەی مانگی دووی فەرمانبەرانی هەرێم ڕەوانە دەكرێت لە نێوان 955 ملیار بۆ 960 ملیار دینار دەبێت، چونكە واڕێككەوتن كراوە كە تاوەکو كۆتایی ئەمساڵ هیچ گۆڕانكارییەك لە لیستی مووچەی هەرێم نەكرێت تەنها ئەو فەرمانبەرانە زیاد بكرێن كە ئێستا لە مۆڵەتی دایكایەتی یاخود مۆڵەتی نەخۆشییان هەیە، یاخود ئەو فەرمانبەرانە لە لیستەكە دەربهێندرین كە لەمانگەكانی ئەمساڵ خانەنشین دەبن، بۆیە بەهەموو ئەگەرێك هەفتەی داهاتوو پارەی مووچەی مانگی دووی فەرمانبەرانی هەرێم ڕەوانە دەكرێت.