سبەینێ دادگای فیدراڵی لەسەر سكاڵاكەی سەرۆككۆمار بۆ مووچەی فەرمانبەرانی هەرێم بڕیار دەدات
لەتیف رەشید
SNN-عەلی حەمەسەعید
بەگوێرەی خشتەی دانیشتنەكانی سبەینێ سێشەممە 18/2/2025 ی دادگای فیدراڵی عێراق، تاوتوێی ئەو سكاڵایە بكات كە لەلایەن سەرۆككۆماری عێراق لەسەر سەرۆك وەزیران و وەزیری دارایی تۆماركردووە بۆ مووچەی فەرمانبەرانی هەرێم.
بەگوێرەی زانیارییەكانی SNNلە دانیشتنەكەی سبەی دادگای فیدراڵی عێراق، تاوتوێی ئەو سكالایەی ( د. لەتیف ڕەشید) سەرۆككۆماری عێراق یەكلایدەكرێتەوە كە داوایان لە دادگای فیدراڵی عێراق كردبوو ئەمرێكی وەلائی دەربكات بۆ ئەوەی مانگانە مووچە لەكاتی خۆیدا ڕەوانە بكرێت و هیچ بابەتێك نەكرێتە بیانوو بۆ ناردنی مووچە.
ئاماژە بەوەشكراوە، سكاڵاكەی سەرۆك كۆماری عیراق كە لەسەر ( محەمە شیاع سودانی) سەرۆك وەزیرانی عێراق و ( تەیف سامی) وەزیری دارایی عێراقی تۆماركردووە، لە چوار خاڵ پێكهاتووە و جگە لەوەی داوادەكرێت فەرمانێكی خێرا بۆ پابەندكردنی وەزارەتی دارایی بە خەرجكردنی مووچەی فەرمانبەرانی هەرێم دەربكرێت، هاوكات، پابەندكردنی وەزارەتی دارایی عیراق بە خەرجكردنی مووچەی فەرمانبەرانی هەرێم بە شێوەیەكی بەردەوام و بەبێ دواكەوتن.
هەر لە زانیارییەكانی SNNئەوەشهاتووە كە لە سكاڵاكەی سەرۆك كۆمار داواكراوە بۆ جێبەجێكردنی تەوتین و بەبانكیكردنی مووچەی فەرمانبەرانی هەرێم هاوشێوەی ئەو رێكارانە بێت كە لە حكومەتی عیراق دەگیرێتەبەر، هاوكات چاوەڕوان دەكرێت لەدانیشتنەكەی سبەی ئەو بابەتە یەكلایی بكریتەوە و بڕیاری پێویستی لەبارەوە بدرێت.
