دروستكردنی لیژنە بۆ مووچەی مانگی 12 تەنها بۆ كات كوشتن بوو

SNN-عەلی حەمە سەعید

ئەندامێكی لێژنەی دارایی پەرلەمانی ئاماژە بەوە دەكات، سەرۆكی هەرێم نەیتوانی گرفتی مووچەی مانگی 12 چارەسەر بكات ئیتر چۆن بە لیژنەیەكی لاوەكی چارەسەر دەكرێت، جەختیش دەكاتەوە ئەو لیژنەیەی كە بۆ بەدواداچوونی مووچەی مانگی 12ی ساڵی ڕابردووی فەرمانبەرانی هەرێم پێكهات تەنها بۆ كات كوشتن دروستكرا.

د. جەمال كۆچەر، ئەندامی لیژنەی دارایی و هاوكات ئەندامی لیژنەی لاوەكی بۆ چارەسەری مووچەی مانگی 12ی فەرمانبەرانی هەرێم بە SNNی ڕاگەیاند: ئەو لیژنە لاوەكییەی كە بۆ بەدواداچوون و چارەسەركردنی مووچەی مانگی 12ی فەرمانبەرانی هەرێم دروستكرا، تەنها بۆ كات كوشتن و لەبیربردنەوەی ئەو بابەتەبوو، چونكە تا ئێستا ئەو لیژنەیە تەنها یەك كۆبوونەوەشی بۆ ئەو بابەتە نەكردووە.

ئاماژەی بەوەشكرد، لەسەردانەكەی سەرۆكی هەرێم بۆ بەغدا نەیتوانی گرفتی مووچەی مانگی 12ی فەرمانبەرانی هەرێم چارەسەر بكات، ئیتر لیژنەیەكی لاوەكی لە لیژنەی دارایی چۆن دەتوانێت ئەو گرفتە چارەسەر بكات هەرچەندە چارەسەركردنیشی لەلایی ئێمە نییە.

ئەو ئەندامەی لیژنەی دارایی لە پەرلەمانی عێراق ئەوەشی خستەڕوو، (تەیف سامی) وەزیری دارایی عێراق چەندین جار و لە چەندین بۆنەدا بە بەرپرسانی هەرێمی ڕاگەیاندووە كە بابەتی مووچەی مانگی 12 لای ئێمە داخراوە و پارەمان بۆ ئەو مانگە ناردووە، بۆیە باسكردن لە مووچەی مانگی 12 هیچی تێدا بەسەر نییە.