SNN-
کەیس کێلۆگ، نێردەی تایبەتی ئەمریکا بۆ ئۆکرانیا وەڵامی نیگەرانییەکانی کیێڤی لەبارەی رێککەتنی ئاگربەست لەگەڵ رووسیا دایەوە و رایگەیاند، ئەمریکا داوا لە ئۆکرانیا ناکات هیچ رێککەوتنێک قبوڵبکات کە واشنتن کاری لەسەر دەکات.
وەزیرانی دەرەوەی ئەمریکا و رووسیا لە ریازی پایتەختی سعودیە رۆژی سێ شەممە کۆدەبنەوە و ڤۆلۆدیمیر زێلێنسکی، سەرۆکی ئۆکرانیاش وتی: “ئاگاداری ئەو کۆبوونەوەیە نین و ئەنجامەکەی قبوڵناکەن”.
بڕیارە لەم هەفتەیەدا، نێردەی تایبەتی ئەمریکا سەردانی ئۆکرانیا بکات و پرسی ئاگربەست لەگەڵ رووسیا لەگەڵ زێلێنسکی تاوتوێبکات.
باسی لەوەشکرد، بەرپرسانی ئەمریکا لەسەر ئاستێکی فراوان لەهەوڵدان بۆ کۆکردنەوەی مۆسکۆ و کیێڤ لەسەر مێزی گفتوگۆ، ئۆکرانیا دەستکراوەیە رێککەوتن لەگەڵ رووسیا قبوڵبکات یاخود نا.
نێردەی تایبەتی ترەمپ، ئاماژەی بەوەشکرد، ئەرکی ئەوان تەنیا ئاسانکارییە بۆ رێککەوتنێک کە زێلێنسکی و کابینەکەی وەک سەرۆکێکی هەڵبژێردراو و شەرعی وڵاتێکی سەربەخۆی خاوەن سەروەریی بڕیاری لێدەدەن.
نێردەی تایبەتی ئەمریکا وتیشی، “یەکێتیی ئەوروپا بەشداریی کۆبوونەوەکانی پەیوەندیدار بە رێککەوتنی ئۆکرانیا ناکات، بەڵام دەکرێت بۆچوونی خۆیان لەوبارەیەوە پێشکەشبکەن”.
