نوێترین زانیاری لەبارەی گەشتنی پارە و دابەشكردنی مووچەی مانگی شوبات

SNN-عەلی حەمە سەعید

وابڕیارە یەك شەممەی داهاتوو لیستی مووچەی مانگی شوباتی فەرمانبەران بەشێوەی ئەلیكترۆنی ڕەوانەی بەغدا بكرێت و پێش هاتنی مانگی ڕەمەزان مووچەی فەرمانبەرانی هەرێم دابەشدەكرێت و بڕەكەشی لە نێوان 955 بۆ 960 ملیار دیناردایە.

بەگوێرەی زانیارییەكانی SNNكە لە بەرپرسێكی وەزارەتی دارایی وەریگرتوون ئەوەخراوەتەڕوو، یەكە ژمێریارییەكانی وەزارەتەكانی حكومەتی هەرێم كۆتاییان بە ئامادەكردنی لیستی مووچەی مانگی دووی فەرمانبەران هێناوە، لیستەكەش بە شێوەی ئەلیكترۆنی ڕەوانەی بەغدا دەكرێت و لەسەر بنەمای لیستی مووچەی مانگی یەك ئامادەكراوە.

ئاماژەی بەوەشكرد، ئەو لیستەی كە لەمانگی یە ئامادەكرا بووەتە بنەمان بۆ لیستی مووچەی مانگەكانی داهاتوو، بەڵام تەنها گۆڕانكاری لەناوی ئەو فەرمانبەرانە دەكرێت كە خانەنشین دەبن یاخود مۆڵەتی دایكایەتیان هەبووە و مۆڵەتەكانیان تەواوبووە و دەستبەكار دەبنەوە لەگەڵ هەبوو مۆڵەتی بێ‌ مووچە، جگە لەو گۆڕانكارییانە هیچ زیاد و كەمكردنێك لە ناوی فەرمانبەران ناكرێت ئەوەش ڕێككەوتنی لەسەر كراوە.

ئەو بەرپرسەی وەزارەتی دارایی ئەوەشی خستەڕوو، ماوەی دوو ڕۆژە دابەشكردنی مووچە لە بەغدا دەستپێكردووە، بەگوێرەی ڕێككەوتنی هەولێر و بەغداش دەبێت دابەشكردنی مووچە نەكەوێتە مانگی دوای خۆی، بۆیە دەبێت تا هەفتەی داهاتوو پارە ڕەوانەی هەرێم بكرێت و پێش هاتنی مانگی ڕەمەزان مووچەی مانگی دوو دابەشدەكرێت.