غەریب ئەحمەد : داگای فیدراڵی فەرمانبەرانی ناچار نەكردووە بە هەڵبژاردنی بانكێكی تایبەت بۆ تەوتین
SNN-عەلی حەمە سەعید
ئەندامی ئەنجومەنی نوێنەرانی عێراق ئاماژە بەوەدەكات ناكرێت فشار لەسەر فەرمانبەرانی هەرێم دروستبكرێت بۆ ئەوەی هەماری من پڕبكەنەوە، چونكە دادگای فیدراڵی لە دواین بڕیاری خۆیدا لەو بارەیەوە فەرمانبەرانی سەر پشككردووە لە هەڵبژاردنی هەر بانكێك بۆ تەوتین.
غەریب ئەحمەد، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی ڕاگەیاند: ناكرێت هیچ لایەنێك فشار لەسەر فەرمانبەرانی هەرێم بكات بۆ ئەوەی ناچاریان بكات بانكێكی دیاریكراو هەڵبژێرن بۆ ئەوەی مووچەكانیانی تێدا تەوتین بكرێت، چونكە لە دواین بڕیاری دادگای فیدراڵی كە لەو بارەیەوە دەركراوە جەختی لەوەكردووەتەوە كە، مووچەخۆران ئازادن لە هەڵبژاردنی بانكێك بۆ تەوتینكردنی مووچەكەیان.
ئاماژەی بەوەشكرد، ئەگەر بەفەرمی لقی بانكەكانی رەشید و رافیدەین و بانكی بازرگانی عێراق TBI لە هەرێمی كوردستان بكرێنەوە، ئەوا مووچەخۆران دەتوانن مووچەكەیان تەوتین بكەن لەسەر ئەو بانكەی كە خۆیان دەیانەوێت هەڵیدەبژێرن مانگانە مووچەكەیان وەربگرن.
ئەو ئەندامەی ئەنجومەنی نوێنەرانی عێراق ئەوەشی خستەڕوو، لە بڕیارەكانی دادگای فیدراڵی باسی پرۆژەی هەماری من نەكراوە، بەڵكوو جەخت لەوەكراوەتەوە كە مووچەخۆر ئازادە لە هەڵبژاردنی بانكێك بۆ تەوتینكردنی مووچەكەی، هاوكات دەشبێت ئەو بڕیارە جێبەجێبكرێت لەداهاتوودا چونكە ناكرێت درێژە بدرێت بەم جۆرە دابەشكردنەی مووچە كە ئێستا هەیە.
