ئەمشەو ساردترین شەوی ساڵ تۆمار دەكرێت

SNN-عەلی حەمە سەعید

شارەزایەكی كەشناسی ئاشكرایدەكات كە دوو شەوە پلەكانی گەرما دابەزیون بۆ ژێر سفری سەدی، بەڵام ئەمشەو دەگاتە نزمترین پلە و بە ساردترین شەوی ئەمساڵ هەژمار دەكرێت و لەحاجی ئۆمەرانیش پلەی گەرما دەگاتە 17 پلە ژێر سفر.

ئاراس جەبار، شارەزای كەشناسی بە SNNی ڕایگەیاند: لەئەنجامی گەیشتنی ناوەندی بارستە ھەوا ساردەكەی جەمسەری باكوور ئەمڕۆ لە سەرتاسەری ناوچەكان پلەكانی گەرما نزمبوونەوەیەكی بەرچاوی بەخۆوە بینی و ئەمشەو بۆ كاتەكانی بەرەبەیان ساردترین ماوەی كاریگەری ئەو شەپۆلە دەبێت لەسەر تەواوی ناوچەكانی ھەرێمی كوردستان و عێراق و سووریا و باكووری كوردستان و ڕۆژھەڵاتی كوردستان و ناوچەكانی باكووری سعودیە.

ئاماژەی بەوەشكرد، نزمترین پلەی گەرمی پێشبینیكراو بۆ ئەمشەو و كاتەكانی بەرەبەیانی سبەی سێ شەممە 25/2/2025 بەم شێوەیە ئەبێت، سلێمانی 7 پلە ژێر سفر، ھەولێر 4 پلە ژێر سفر، دھۆك 4 پلە ژێر سفر، كەركوك 2 پلە ژێر سفر، ھەڵەبجە 3 پلە ژێر سفر، سۆران 6 پلە ژێر سفر، پێنجوێن 13 پلە ژێر سفر، حاجی ئۆمەران 17 پلە ژێر سفر، زاخۆ 5 پلە ژێر سفر، رانیە 5 پلە ژێر سفر، كەلار 2 پلە ژێر سفردەبێت.

ئەو شارەزایەی كەشناسی ئەوەشی خستەڕوو، ئەمشەو ساردترین لوتكەی چیا لەسەر ئاستی عێراق و ھەرێمی كوردستان لوتكەی چیای ھەڵگوردە 27 پلە ژێر سفر ئەبێت، هاوكات لوتكەی چیای پیرەمەگرون 16 پلە ژێر سفر و چیای ئەزمەر 11پلە ژێر سفر و چیای كوڕە كاژاو 14 پلە ژێر سفر، بەڵام لە دوو سبەی چوار شەممەوە پلەی گەرمی كاتەكانی ڕۆژ بەرەو بەرزبوونەوە ئەچێت تا كۆتایی ھەفتە بەرێژەی 3 تا 6 پلە، بەڵام لەشەواندا تا سەرەتای ھەفتەی داھاتوو پلەی گەرمی گۆڕانكاری ئەوتۆی بەسەردا نایەت و بەستن و دروستبوونی شەختە بەردەوامی دەبێت.