راگەیەندراوێک لە ئاسایشەوە لەبارەى گرژییەکانى شەوى رابردووى عەربەت

SNN-

دوێنێ شەو لە نزیک شارۆچەکەی عەربەت ئاڵۆزی لە نێوان مامۆستایان و شۆفێری بارهەڵگرەکان دروستبوو، دەزگای ئاسایشی هەرێمیش دەڵێت:” بریندارەکان نەخۆشخانەیان جێهێشتووە و لە ئێستاشدا هیچ کەس دەستگیر نەکراوە”.

لە راگەیەندراوێکدا دەزگای ئاسایشی هەرێمی کوردستان بڵاویکردووەتەوە کە شەوی ڕابردوو 24ی شوباتی 2025و لە نزیک شارۆچکەی عەربەت، بەهۆکاری ڕێگریکردن لە تێپەڕبوونی ژمارەیەک بارهەڵگر لەلایەن مامۆستایان و هاووڵاتيیان، سەرئەنجام بووە هۆی دروستبوونی گرژی و ئاڵۆزی لەنێوانیاندا چەند شۆفێرێک و هاووڵاتییەک بریندار بوون”.

ئاسایشی هەرێمی کوردستان ئاماژە بەوەشدەکات:” دەزگای ئاسایشی هەرێم وەک لایەنی جێبەجێکاری یاسا دەستبەجێ بەمەبەستی کۆنتڕۆڵکردنی ئەو بارودۆخە نەخوازراوە و ڕێگریکردن لە تەشەنەکردنی ئاڵۆزییەکان و سەلامەتی گیانی هەموو لایەک گەیشتنە شوێنی ڕووداوەکە و ڕێکاری یاسایی گرتەبەر بۆ هێورکردنەوەی بارودۆخەکە”.

دەشڵێت:” له ئێستادا هيچ كەس دەستگيرنەكراوه و هاووڵاتییە بريندارەكان لە نەخوشخانه نەماون”.