سبەینێ مامۆستایانی گرێبەست دوو مووچە بەسەریەکەوە وەردەگرن

SNN

وەزارەتی دارایی و ئابووری حکومەتی هەرێمی کوردستان رایگەیاند، سبەینێ چوارشەممە مووچەی مامۆستایانی گرێبەستی وەزارەتی خوێندنی باڵا دابەش دەکرێت.

ئەمڕۆ سێشەممە 25ی شوبات، وەزارەتی دارایی و ئابوری حکومەتی هەرێمی کوردستان لە راگەیەنراوێکدا ئاشکرایکردووە، لەسەر بڕیاری وەزیری دارایی و ئابووری و دوای تەواو کردنی سەرجەم رێکارەکانی وردبینی و ژمێریاری لە وەزارەتی خوێندنی باڵا و گەیشتنی لیستەکان بۆ گەنجینەکانی وەزارەتی دارایی، بڕیار دراوە مووچەی مامۆستایان دابەش بکرێت.

لە راگەیاندراوەکەدا هاتووە، مووچەی مانگەکانی تشرینی یەکەم و تشرینی دووەمی ساڵی 2024ـی مامۆستایانی گرێبەستی وەزارەتی خوێندنی باڵا بەپێی بەرواری دەست بەکاربوونیان دابەش دەکرێت و ئاماژە بەوەش کراوە کە تەمویلی ئەم مووچانە لەسەر داهاتی ناوخۆ خەرج دەکرێت.

ئەمە لەکاتێکدایە، مامۆستایانی گرێبەست چەندین مانگە چاوەڕێی وەرگرتنی مووچەکانیانن و دواکەوتنی مووچە یەکێک بووە لە کێشە سەرەکییەکانی مامۆستایانی گرێبەست لە زانکۆ و پەیمانگاکانی هەرێمی کوردستان.