ئەمریکا جارێکی دیکە داوا دەکات هەناردەی نەوتی هەرێم دەست پێ بکاتەوە

SNN-

وەزیری دەرەوەی ئەمریکا داوا لە سەرۆکوەزیرانی عێراق دەکات بەزوویی دەست بە هەناردەکردنەوەی نەوتی هەرێمی کوردستان بکەن و هەروەها مەرجی گرێبەستی کۆمپانیا نەوتییەکانی ئەمریکا کە لە هەرێمی کوردستان کاردەکەن لەبەرچاوبگرن.

وەزیری دەرەوەی ئەمەریکا و سەرۆك وەزیرانی عێراق پەیوەندییەکی تەلەفۆنییان ئەنجامداوە و بەپێی ناوەڕۆکى پەیوەندییەکەش هەردولا جەختیان لەسەر زوو دەستپێکردنەوەی هەناردەی نەوتی هەرێمی کوردستان و کەمکردنەوەى کاریگەریی گروپە چەکدارەکان کردوەتەوە.

تامی بروس، وتەبێژى وەزارەتى دەرەوەى ئەمەریکا لە راگەیەندراوێكدا بڵاویکردەوە: ماركۆ رۆبیۆ – وەزیری دەرەوەی ئەمەریکا، پەیوەندییەکی تەلەفۆنی لەگەڵ محەمەد شیاع سودانی، سەرۆك وەزیرانی عێراق ئەنجامداوە، لە پەیوەندییەکەدا باسیان لە هاوبەشییە ستراتیژییەکان، هەناردەکردنەوەی نەوتی هەرێمی کوردستان و کەمکردنەوەی کاریگەریی گروپەچەکدارەکان کردووە.

بە گوێرەی بڵاوکراوەکە، روبیۆ و سودانی هاوڕابوون لەسەر سەربەخۆیی عێراق لەڕوی وزەوە و جەختیشیان لەسەر زو دەستپێکردنەوەی هەناردەکردنی نەوتی هەرێمی کوردستان، لە ڕێگەی بۆری عێراق – تورکیا کردوەتەوە.

لەلای خۆشیەوە، مارکۆ روبیۆ  بە سودانی راگەیاندوە، پێویستە رێز لە مەرجی گرێبەستە نەوتییەکانی کۆمپانیا ئەمەریکییەکان بگیرێت کە لە هەرێمی کوردستان و عێراق کاردەکەن، لە پێناو راکێشانی وەبەرهێنانی زیاتری ئەمەریکی بۆ وڵاتەکە.