SNN-
شەوی ڕابردوو فڕۆکە جەنگیەکانی ئیسرائیل دەوروبەری دیمەشقی پایتەختی سووریایان کردە ئامانج.
ڕوانگەی سووری بۆ مافەکانی مرۆڤ ڕایگەیاندووە، “بۆ دووەمجارە لەماوەی چەند کاتژمێرێکدا، فڕۆکەکانی ئیسرائیل هەڵیانکوتایە سەر شوێنەکانی سنووری سوریا و لوبنان.”
هاوکات، تەلەفزیۆنی دەوڵەتی سوریا بڵاویانكردەوە، درەنگانی شەوی رابردوو، فڕۆکە جەنگییەکانی ئیسرائیل هێرشی ئاسمانییان بۆ سەر شارۆچکەیەک لە باشوری دیمەشقی پایتەخت و پارێزگای درعا لە باشوری ئەو وڵاتە ئەنجامداوە.
ئاژانسی هەواڵی ڕۆیتەرز لە زاری سەرچاوەیەکەوە ڕایگەیاندووە، شەوی ڕابردوو تەقینەوە و فڕینی فڕۆکەی جەنگی ئیسرائیل بە نزمی بەسەر ئاسمانی دیمەشقەوە بینراوە.
میدیاکانی سووریا و سەرچاوەیەکی ئەمنی ڕایانگەیاند، “فڕۆکە جەنگییەکانی ئیسرائیل باشووری دیمەشق دەکەنە ئامانج.”
لای خۆیەوە میدیای ئیسرائیل ڕایانگەیاندووە، چوار هێرشی ئیسرائیل شوێنە سەربازییەکانی ڕژێمی پێشوویان کردە ئامانج لە ناوچەی ئەلکیسوای دەوروبەری دیمەشق.
