بە ئەگەرێكی زۆرەوە ئەمڕۆ لیستی مووچەی فەرمانبەران بە سیستەمی پەیرۆڵ ڕەوانەی وەزارەتی دارایی عێراق دەكرێت
مووچە
SNN-عەلی حەمە سەعید
لەگەڵ ئەوەی وابڕیاربوو كە مووچەی هیچ مانگێك نەكەوێتە مانگی دوای خۆی، بەڵام دابەشكردنی مووچەی مانگی دوو دەكەوێتە مانگی سێ، ئەوەش بەهۆی ئەوەی وەزارەتی دارایی هەرێم درەنگ لیستی مووچەی ئامادەكردووە، هاوكات دیاریش نییە عێراق ڕەزامەند دەبێت بە ڕاستەوخۆ نادرنی پارە یاخود نا.
بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوەخراوەتەڕوو، بە ئەگەرێكی زۆرەوە ئەمڕۆ لیستی مووچەی فەرمانبەران بە خانەشنینانی شارستانی و سەربازی بەسیستەمی پەیرۆڵ ڕەوانەی وەزارەتی دارایی عێراق دەكرێت، بەڵام ئەمە بەو وتایە نایەت كە عێراق ڕاستەوخۆ پارە ڕەوانەی هەرێم بكات.
ئاماژەی بەوەشكرد، دوای ناردنی لیستەكە بەشێوەی سیستەمی پەیرۆڵ، دەبێت لە لایەن وەزارەتی دارایی عێراق وردبینی بۆ لیستەكە بكرێت، هاوكات ئەم مانگەش تەنها دوو ڕۆژی ماوە، لەگەڵ ئەوەشدا وەزارەتی دارایی عێراق پێشتر نوسراوێكی ئاراستەی هەرێم كردووە بە ناردنی داهاتی ناوخۆ جگە لەو 51 ملیارەی نێردرابوو،هەروەها ناوی فەرمانبەران بۆ تەوتین، تا ئێستا هەرێم بەفەرمی وەڵامی ئەو نوسراوەی نەداوەتەوە.
ئەو بەرپرسەی وەزارەتی دارایی ئەوەشی خستەڕوو، بەدڵنیاییەوە ناردنی پارەی مانگی دوو دەكەوێتە مانگی داهاتوو، بەڵام دیاریش نییە ئاخۆ عێراق بەیەك گوژكە و راستەوخۆ ڕازی دەبێت بەناردنی پارە یاخود داواكاری دیكەی دەبێت.
