ئەو فەرمانبەرانەی ئەمساڵ خانەنشین بوون ئەم مانگەش مووچە وەرناگرن

SNN-عەلی حەمە سەعید

دوای ئەوەی یاسای خانەنشینی یەكگرتوو لە هەرێم كەوتە بواری جێبەجێكردنەوە، لەسەرەتای ئەمساڵەوە زیاد لە 25 هەزار فەرمانبەر خانەنشین بوون، هاوكات ئەو فەرمانبەرانە مووچەی مانگی یەكیان وەرنەگرتووە و بۆ ئەم مانگەش مووچە وەرناگرن، بەلام بۆمانگی داهاتوو بەشێكی‌وان مووچە وەردەگرن.

سادق عوسمان، وتەبێژی یەكێتی خانەنشینانی كوردستان بە SNNی ڕاگەیاند: دوای جێبەجێكردنی یاسای خانەنشینی یەكگرتوو لە هەرێم، ئەو فەرمانبەرانەی كە لەدایكبووانی ساڵانی 1962، 1963 و 1964 خانەنشین بوون و بەهۆی تەواونەبوونی مامەڵەكانیان، مووچەی مانگی یەكیان وەرنەگرتووە، هاوكات لە لیستی مووچەی مانگی دووش ناوی ئەو خانەنشینە نوێیانەی تێدا نییە.

ئاماژەی بەوەشكرد، بەهۆی ئەوەی هێشتا مامەڵەكانی خانەنشینییان تەواو نەكردووە بۆیە نەتواندراوە ناوی ئەو خانەنشینانە بخریتە ناو لیستی مووچەی مانگی دوو، بەڵام بۆ مانگی سێ‌ ناوی بەشێكی ئەو خانەنشینانە دەخرێتە ناو لیستی مووچە و مووچەی سێ‌ مانگ بەسەر یەكەوە وەردەگرن.

وتەبێژی یەكێتی خانەنشینانی كوردستان ئەوەشی خستەڕوو، بەگوێرەی یاسای خانەنیشینی هەر فەرمانبەرێك خانەنشین ببێت، دەبێت مووچەی 12 مانگی پێكەوە پێ بدرێت، بەڵام تا مامەڵەی خانەنشینیان تەواو نەبێت و ناسنامەی خانەنشینی وەرنەگرن، ئەو پارەیەش وەرناگرن.