SNN-عەلی حەمە سەعید
لەگەڵ ئەوەی نزیكەی ساڵێك دەبێت بە بیانووی نۆژەنكردنەوەی بازاڕی قەیسەری هەولێر ڕێگە بەخاوەن دووكانەكانی ئەو بازاڕە نەدراوە بگەڕێنەوە دووكانەكانیان، بەڵام وابڕیاربوو كە پێش مانگی ڕەمەزان دووكانەكان بدرێنەوە بە خاوەنەكانیان و نۆژەنكردنەوەی كۆتایی پێبێت بەلام وادەرنەچوو.
وەلید كەریم، یەكێك لەخاوەن دووكانەكانی بازاڕی قەیسەری هەولێر بەSNNی ڕاگەیاند: دوای سوتانی بازاڕی قەیسەری لە مانگی پێنجی ساڵی ڕابردوو، بەڵام تا ئێستا لەلایەن ئیدارەی شاری هەولێرەوە ڕێگریمان لێدەكرێت بچینەوە ناو دووكانەكانمان، ئەوەش بە بیانووی ئەوەی دووكانەكان بە شێوەی كەلتوری نۆژەندەكەنەوە، بەڵام ئەمە زیانێكی مادی زۆری لە ئێمە داوە و بژێوی ژیانی سەدان خێزان لەسەر ئەو دووكانانەیە.
ئاماژەی بەوەشكرد، پێشتر چەند جارێك داوامان لە پارێزگاری هەولێر كردبوو كە پەلە بكەن لە كارەكانی نۆژەنكردنەوەكە چونكە بژێوی ژیانی سەدان خێزان لەسەر ئەم دووكانانەیە، هەر ئەوكاتە پارێزگاری هەولێر بەڵێنی ئەوەی پێداین كە پێش مانگی ڕەمەزان كاری نۆژەنكردنەوە كۆتایی پێدێت و دووكانەكان ڕادەستی خاوەنەكانیان دەكرێتەوە، بەلام ئەوە مانگی ڕەمەزانیش هات هێشتا دیار نییە كەی دووكانەكانمان ڕادەستدەكرێتەوە و ئەم بەڵێنەشیان وەك بەڵێنەكانی پێشووتریان بوو.
ئەو خاوەن دووكانەی بازاڕی قەیسەری هەولیر ئەوەشی خستەڕوو، تێپەڕبوونی ئەو ماوە زۆرە بەسەر نۆژەنكردنەوەی دووكانەكانی بازاڕی قەیسەری بووەتەهۆی ئەوەی بژێوی ژیانی سەدان خێزانی هەولێر خراپتر ببێت و سەدان هاووڵاتی بێكار ماونەتەوە، بۆیە ئەوەش بارگرانی زیاتر بۆسەر ئێمە و خاوەن دووكانەكانی دیكەی ئەو بازاڕە دروستدەكات
