لەبارەی كەمبوونەوەی ڕێژەی گوندنشینان لەهەرێم هۆشداری دەدرێت

SNN-عەلی حەمە سەعید

ئەندامێكی لیژنەی كشتوكاڵ لە پەرلەمانی عێراق ئاماژە بەوەدەكات، بەراورد بە عێراق هەرێمی كوردستان رێژەی گوندنشینی كەمترە، بۆیە ئەركی حكومەتی هەرێمە بەجێبەجێكردنی پڕۆژەكەی جێگری سەرۆكی حكومەت ئاوڕی جددی لەكەرتی كشتوكاڵ و گەشتیاری بداتەوە ئەگەر وانەكات لەڕووی ئابورییەوە هەرێم زیانی زۆر دەكات.

غەریب ئەحمەد، ئەندامی لیژنەی كشتوكاڵ لە ئەنجومەنی نوێنەرانی عێراق بە SNNی راگەیاند: بەگوێرەی ئەو ئامارانەی وەزارەتی پلاندانانی عێراق لەچوارچێوەی راگەیاندنی كۆتایی ئامارەكانی سەرژمێری بڵاویكردووەتەوە، بەراورد بە عێراق رێژەی شارنشین لەهەرێمی كوردستان زیاترەو گوندنشینمان كەمترە، بۆیە ئەركی حكومەتی هەرێمە زیاتر گرنگی بە گوندەكان و كەرتی كشتوكاڵ بدات و هەوڵی ئاوەدانكردنەوەی گوندەكان بدات.

ئاماژەی بەوەشكرد، ئاوەدانكردنەوەی گوندەكان بەپشتیوانی گوندنشینەكان و سەیركردنی ئەو پرسە وەك پرسێكی ئابوری بەهێز دەبێت، هاوكات هەرچەندە وەزارەتی كشتوكاڵی حكومەتی هەرێمی كوردستان هەوڵەكانی بەردەوامە بۆ پشتیوانی كەرتی كشتوكاڵ، بەڵام بێگومان پێویستە هانی زیاتری خەڵك بدرێت بۆ ئەوەی نیشتەجێی گوندەكان ببن، چونكە دەبینین حكومەتی عیراق گرنگییەكی زۆر بەگوندنشینەكان دەدات و ئەگەر هەرێمیش وانەكات بێگومان لەچەند ساڵی ئایندەدا جیاوازییەكەمان زۆر زیاتر دەبێت.

ئەوئەندامەی لیژنەی كشتوكاڵ لەئەنجومەنی نوێنەرانی عیراق ئەوەشی خستەڕوو، جێگری سەرۆكی حكومەت پلانی تۆكمەی هەیە بۆ دووبارە بوژاندنەوەی گوندەكان و كەرتی كشتوكاڵ، بۆیە هێشتا درەنگ نییە كەدەست بەو پلانە بكرێت و پەرە بەكەرتەكانی كشتوكاڵ و گەشتیاری لەژێر ناوی گەشتوكاڵ بدرێت، ئەمەش رێگایەكی باشە بۆ بوژاندنەوەی كەرتەكانی ئابووری و كشتوكاڵ و گەشتیاری.

بە پێی ئاماری كۆتایی سەرژمێری دانیشتوانی عێراق، دەركەوتووە، كە لە 70.17٪ دانیشتووانی عیراق شارنشینن و  29.83٪  گوندنشینن، بەڵام رێژەی دانیشتوانی گوندنشین لەهەرێمی كوردستان بۆ 15.43٪ كەمبووەتەوەو لەبەرامبەریشدا 84.57٪ی شارنشینن.