پێچەوانەی وەزیری نەوتی عێراق، ئەپیكۆر هەناردەكردنەوەی نەوت لە ئەمڕۆدا ڕەتدەكەنەوە

SNN-عەلی حەمە سەعید

لەگەڵ ئەوەی وەزارەتی نەوتی عێراق بڵاویكردەوە كە لە چەند كاتژمێری داهاتوودا دەستدەكەنەوە بە هەناردەكردنەوەی نەوتی هەرێم، بەڵام كۆمەڵەی پیشەسازی نەوتی كوردستان ڕاگەیەندراوێكی بڵاو كردەوە و ڕایدەگەیەنێت، هیچ ڕێكەوتنێك نیە بۆ دەستپێكردنەوەی هەناردەی نەوت لە ئەمڕۆدا.

لە ڕاگەیەندراوەكەدا کە کۆپییە دەست SNN کەوتووە، ئەوە هاتووە چەندین جار ڕوونمان كردوەتەوە كۆمپانیاكانی ئەندامی APIKUR ئامادەن دەستبەجێ دەست بە هەناردەكردن بكەنەوە هەركاتێك كە ڕێككەوتنێكی فەڕمی كرا بۆ دابینكردنی گەرەنتی پارەدان بۆ نەوتی هەناردەكراوی ڕابردوو و داهاتوو كە لەگەڵ مەرجە یاسایی و بازرگانییە گرێبەستییەكانی ئێستاماندا بگونجێت.

ئاماژەبەوەشكراوە، هێشتا هیچ پەیوەندییەك لەم بارەیەوە بە كۆمپانیاكانی ئەندامی ئەپیكور نەكراوە وكۆمپانیاكانی ئەندامی ئەپیكور ڕێككەوتنیان نییە كە ببێتە هۆی دەستپێكردنەوەی هەناردەكردنی نەوت لەمڕۆدا.

كۆمەڵەی APIKUR  پێك هاتوون لە هەشت كۆمپانیای بەرهەمهێنی نەوت لە هەرێم و كێڵگەكانی تاوكێ و پێشخابوور و سەرسەنگ و ئەتروش و شێخان و تەقتەق و سارتا و باشیك بەڕێوە دەبەن و ٦٥ لەسەدی نەوتی هەرێم بەرهەم دەهێنن.

ئەوەش لەكاتێكدا كە هەر ئەمڕۆ وەزارەتی نەوتی عێراق بلاویكردەوە كە لە چەند كاتژمێری داهاتوودا دەستدەكەنەوە بە هەناردەكردنەوەی نەوت لەڕێگەی بۆری بۆ بەندەری جەیهان لەڕێگەی كۆمپانیای سۆمۆوە.

کۆپییەکی راگەیەنراوەکەی ئەپیکور