وەفدێکی باڵای وەزارەتی سامانە سروشتییەکان گەیشتنە بەغدا

SNN

سەرچاوەیەکی وەزارەتی نەوتی عێراق ئاشکرای کردووە، وەفدێکی وەزارەتی سامانە سروشتییەکانی هەرێمی کوردستان ئەمڕۆ یەکشەممە (2ـی ئازار) گەیشتونەتە بەغداد، بۆ دوا رێککەوتن و لابردنی لەمپەرەکانی بەردەم پڕۆسەی هەناردەکردنەوەی نەوتی هەرێمی کوردستان کە زیاتر لە دوو هەفتەیە هەردوولا لەسەری رێککەوتون.

بەوتەی هەمان سەرچاوە، لە ئێستادا کۆبونەوەی بەرپرسانی باڵای هەردوو وەزارەتی نەوتی عێراق و سامانە سروشتییەکانی هەرێمی کوردستان لە باڵەخانەی وەزارەتی نەوت بەڕێوەدەچێت، بۆ یەکلایی کردنەوەی سەرجەم ناکۆییەکان و لابردنی بەربەستەکانی بەردەم پڕۆسەی هەناردەکردنەوەی نەوتی هەرێمی کوردستان بۆ بەندەری جەیهانی تورکیا.

سەرچاوەکەی وەزارەتی نەوت وتوویەتی :”بڕیار بوو ئەو کۆبونەوەیە رۆژی سێشەممە بەڕێوەبچێت، بەڵام بەهۆی هەندێک پێشهاتەوە کۆبونەوەکە پێشخراوە”، بەبێ ئەوەی هیچ وردەکارییەکی زیاتر ئاشکرا بکات.

بەپێی زانیاریەکان ماوەی چەند رۆژێکە وەفدێکی کۆمپانیا نەوتییەکانی هەرێمی کوردستان و کۆمەڵەی پیشەسازی نەوتی کوردستان (ئەپیکۆر) لە کۆبونەوەدا بۆ گفتوگۆکردن لەسەر پشک و بەرکەوتە و قەرزەکانیان لەسەر هەرێمی کوردستان کە پێش راگرتنی هەناردەی نەوت کەوتوەتە سەر حکومەتی هەرێم، بۆ ئەوەی داوای رێککەوتن و گرەنتییان کردووە بۆ وەرگرتنەوەی قەرزەکانیان و مافەکانیان دوای دەستپێکردنەوەی پڕۆسەی هەناردەکردنەوەی نەوتی هەرێمی کوردستان.