هەڵەبجەییەكان لەبری دابینكردنی نان داوای خەرجكردنی مووچەی مانگی 12 و دوو دەكەن
نانهواخانهیهك له سلێمانى | فۆتۆ: SNN
SNN-عەلی حەمە سەعید
ماوەی چەند ڕۆژێكە دەزگا ڕاگەیاندنەكانی پارتی دەستیان بە هەڵمەتێك كردووە كە بەفەرمانی سەرۆكی حزبەكەیان بڕی یەك ملیۆن نان بۆ هاووڵاتییانی سنوری هەڵەبجە دابیندەكرێت، لەبەرامبەردا هەڵەبجەییەكان داوا دەكەن لەبری دابینكردنی نانی وشك بۆیان مووچەكانیان بۆ خەرجبكرێت.
ئاسۆ ڕەحیم، یەكێك لە خاوەن شەهیدی كیمیابارانی هەڵەبجە بە SNN-ی ڕاگەیاند: هەموو لایەك دەزانین كە خەڵكی هەڵەبجە و دەوروبەری لە چ ئاستێكی ڕۆشبیریدان، زۆر لەوە گەورەترن كە كەسانێك بیانەوێت بە دابینكردنی چەند شتێكی بچوك كاریگەری لەسەر هەست و دەورنیان بكات، بەتایبەت كە ئێستا باس لەوەدەكرێت چەند نانەوایەك بێ بەرامبەر نان دەدەن بەهاووڵاتییان ئەوەش بەفەرمانی سەرۆكی پارتی.
ئاماژەی بەوەشكرد، ئێمە پێمان خۆش بوو كە بەفەرمانی سەرۆكی پارتی بڕیاری خەرجكردنی مووچەی مانگی 12 و مووچەی مانگی دوو بدرایە، ئەگەر دەوترێت سەرۆكی پارتی هیچ پۆستێكی لە حكومەتدا نییە، خۆ دەزانین كوڕەكەی ئەوە سەرۆكی حكومەتە و هەموو كاروبارەكانی ئەم هەرێمەی بۆ خۆی قۆرخكردووە، دەیتوانی فەرمان بە كوڕەكەی بكات بۆ ئەوەی فەرمانێكی لەو جۆرەی دەربكات.
ئەو خاوەن شەهیدەی كیمیابارانی هەڵەبجە ئەوەشی خستەڕوو، ئێمە باش ئەوە دەزانین كە حزبەكەی سەرۆكی حكومەت و خودی سەرۆكەكەی ئەگەر بیانەوێت بەدەم هاووڵاتییانەوە بێن ئەوا مافە سروشتییەكەی خۆیانیان بۆ دابیندەكردین نەك وەك خێر بێن نانی وشكمان بۆ دابین بكەن، چونكە ئەو بودجەیەی لەداموودەزگاكانی خۆیان خەرجی دەكەن كەمتر نییە لەو بڕە پارەیەی كە بۆ مووچە پێویستە.
