لەبارەی نەبوونی گرفتی كەمی غاز لە سنوری سلێمانی دڵنیایی دەدرێت

SNN-عەلی حەمە سەعید

لەگەڵ ئەوەی ماوەی چەند ڕۆژێكە لە هەولێر و دهۆك قەیرانی كەمی غاز و بەرزبوونەوەی نرخەكەی سەریهەڵداوە، بەڵام بەوتەی سەرۆكی ئەنجومەنی كارگەكانی غاز لە سلێمانی دڵنیایی دەداتە هاووڵاتیان كە نە قەیرانی كەمی غاز هەیە و نە نرخەكەشی بەرز بووەتەوە.

كۆچەر تاهیر، سەرۆكی ئەنجومەنی كارگەكانی غاز لە سلێمانی بە SNNی ڕاگەیاند: بەهۆی ئەوەی لە ئێستادا زیاد لە 600 تۆن یەدەگی غازی كۆگاكراومان هەیە و بەردەوامیش بری پێویست غازمان بۆدێت، بۆیە بەدڵنیاییەوە لە ئێستا هیچ گرفتێكمان لە نەبوونی غازی ماڵان نییە و هەروەك مانگەكانی پێشوو دۆخەكە ئاساییە.

ئاماژەی بەوەشكرد، بەهۆی ئەوەی لەمانگی رەمەزاندا شێوازی كاركردنی كارگەكان لە ڕۆژەوە گۆڕدراوە بۆ شەو كارگەكان زیاتر بەشەواندا كاردەكەن و بریكارەكانی غازیش بە ڕۆژدا غاز دەگەیەننە گەڕەكەكان، بۆیە خۆشبەختانە نە گۆڕانكاری بەسەر نرخی غاز هاتووە لە سلێمانی نەقیەرانی نەبوونی غازیش هەیە.

سەرۆكی ئەنجومەنی كارگەكانی غازی سلێمانی ئەوەشی خستەڕوو، لەوەرزی هاویندا بۆ سنوری پارێزگای سلیمانی پێویستمان بەبڕی 300 تۆن غاز دەبێت، بەلام لەگەڵ هاتنی وەرزی زستان خواستن لەسەر بەكارهێنانی غاز زیاد دەكات و پێویستمان بە بڕی 400 تۆن غاز دەبێت، بەڵام بەگوێرەی ئەو پلانەی هەمان بەهەماهەنگی لەگەڵ لایەنە پەیوەندیدارەكانی دیكەی سلێمانی نەمانهێشتووە قەیرانی غاز دروست ببێت و نرخەكەشی بەرز ببێتەوە.