سۆران عومەر: سێ کێشە لەبەردەم نەناردنی مووچەی مانگی دوودا هەیە

SNN-
سۆران عومەر، ئەندامی ئەنجومەنی نوێنەرانی عێراق رایگەیاند، بەغدا داوای ژمارە بانکی ئەو فەرمانبەرانەی کردووە کەلە هەژماری من تۆمار کراون و هەرێمی کوردستان ڕازی نییە بەوە، “سێ کێشە لەبەردەم نەناردنی مووچەی مانگی دوودا هەیە.”

سۆران عومەر وتیشی، بەپێی نووسراوی محەمەد شیاع سودانی، سەرۆک وەزیرانی عێراق کە بۆ وەزارەتی دارایی عێراقی ناردووە، سێ داواکاری نوێی هەبووە بۆ ناردنی مووچەی فەرمانبەرانی هەرێم.

ئاماژەی بەوەشکرد یەکێک لە داواکارییەکانیان، “ناردنی هەژماری بانکی و زانیاری فەرمانبەرانی هەرێمە بە هەژماری منیشەوە، بۆ ئەوەی ڕاستەوخۆ لەلایەن بانکی ناوەندییەوە ڕاستەوخۆ مووچە بخرێتە سەر هەژمارەکانیان.”

باسی لەوەشکرد، “هەرێمی کوردستان بەو داواکارییە ڕازی نییە و دەڵێت ئەوە هەڕەشەیە بۆ سەر قەوارەی هەرێم، کە هیچ مەترسییەکی بۆ سەر قەوارەی هەرێم نییە.”

ئەوەشی خستەڕوو، “یەکێکی تر لە داواکارییەکان داهاتی نانەوتییە، بەغدا بەو 51 ملیار دینارە و دەڵێت، دەبێت زیاتر بێت، هەروەها، داوای داهاتی نەوتیش دەکات، کە هەرێمی کوردستان نەوتی لە ڕێگەی تانکەرەوە فرۆشتووە و داهاتەکەی نادیارە.

لە بارەی کاتی گەیشتنی مووچەی مانگی دوو، سۆران عومەر وتی، “هیچ زانیارییەکم لەسەر ئەوە نییە کەی مووچەی مانگی دوو دێت.”