پەرلەمانتارێکی کورد داوا دەکات پێش جەژن مووچەی عێراق دابەش بکرێت

SNN-

ئەندامێکی لیژنەی دارایی ئەنجومەنی نوێنەران داوا دەکات پێش هاتنی جەژنی ڕەمەزان مووچەی مانگی ئازاری فەرمانبەرانی عێراق دابەش بکرێت، ئەوە لە کاتێکدایە کە تاوەکو ئێستا فەرمانبەرانی هەرێمی کوردستان مووچەی مانگی شوباتیان وەرنەگرتووە.

ئەمڕۆ چوارشەممە، جەمال کۆچەر، ئەندامی لیژنەی دارایی ئەنجومەنی نوێنەران بە ڕۆژنامەی سەباحی ڕاگەیاندووە، وەزارەتی دارایی چەند جارێک جەختیکردووەتەوە کە مووچەی فەرمانبەران پارێزراوە، بۆیە دەکرێت پێش وادەی خۆی دابەشیبکات، بۆئەوەی پێش لە جەژنی ڕەمەزان بگاتە دەست مووچەخۆران.

دەشڵێت،کە کۆتایی ئەم مانگە پشووی جەژن دەستپێدەکات و تاوەکو سەرەتای مانگی داهاتوو بەردەوام دەبێت، بۆیە وا دەخوازرێت کە کاتی دابەشکردنی مووچە پێش بخرێت.

جەمال کۆچەر داواشی کرد پێش جەژن مووچەی خانەنشینان و چاودێری کۆمەڵایەتی دابەشبکرێت و بۆ ئەم مانگەش وەرگرتنەوەی پێشینەکان ڕابگیرێت.

ئەمەش لە کاتێکدایە کە تاوەکو ئێستا فەرمانبەرانی هەرێمی کوردستان مووچەی مانگی شوباتی ڕابردوویان وەرنەگرتووە.