SNN-عەلی حەمە سەعید
شارەزایەكی بواری كەشناسی ئاماژە بەوەدەكات لەهەفتەی داهاتووەوە شەپۆلێكی باران بارین ڕوو لە هەرێمی كوردستان دەكات كە بۆ ماوەی یەك هەفتە بەردەوامی بێت و بەوهۆیشەوە كەشی زستانی بۆ ناوچە جیاوازەكانی هەرێم دەگەڕێتەوە.
شاڵاو هیدایەت، شارەزای بواری كەشناسی بە SNNی ڕاگەیاند: دوای ئەو كەشە گەرمەی كە ڕووی لە هەرێمی كوردستان كردووە و تاڕادەیەك بە جێگیری ماوەتەوە، بەڵام لە ئەنجامی كاریگەری و هاتنە خوارەوەی نزمە پاڵەپەستۆی جەمسەری باكور، پێشبینی دەكرێت لە هەفتەی داهاتوو بە دیاركراوی لە 19 ی مانگەوەوە شەپۆلێكی مامناوەندی بارانبارین هەرێمی كوردستان بگرێتەوە.
ئاماژەی بەوەشكرد، بەهۆی ئەو شەپۆلەوە بڕی باران بارین لە ناوچەیەكەوە بۆ ناوچەیەكی دیكە جیاواز دەبێت، هاوكات هەماتن ئەو شەپۆلە بەلاوازیش كاریگەری لەسەر ناوچەكانی دیكەی عێراق دەبێت.
ئەو شارەزایەی بواری كەشناسی ئەوەشی خستەڕوو، پێشبینی دەكرێت ئەو شەپۆلی باران بارینە بۆماوەی هەفتەیەك كاریگەرییەكانی بەردەوامییان هەبێت و جارێكی دیكە كەشێكی سارد و زستانەی دەستپێبكاتەوە.
