نوێترین زانیاری لەبارەی دابەشکردنی مووچەی مانگی سێ پێش جەژنی رەمەزان

SNN-عەلی حەمە سەعید

تا ئەمڕۆ لیستی مووچەی مانگی سێی فەرمانبەرانی هەرێم ڕەوانەی بەغدا نەكراوە، بەرپرسێكی وەزارەتی دارایی هەرێمیش ئاشكرایدەكات تا ناوەڕاستی هەفتەی داهاتوو یەكە ژمێریارییەكان لیستە بەسیستەمی پەیرۆڵ تەواودەكەن، بەڵام پێش جەژن مووچە دابەشناكرێت.

بەگوێرەی زانیارییەكانی SNNكە لە بەرپرسێَكی وەزارەتی دارایی هەرێم وەریگرتوون ئەوەخراوەتەڕوو، تا ئەمڕۆ شەممە لیستی مووچەی مانگی سێی فەرمانبەرانی هەرێم ڕەوانەی بەغدا نەكراوە، بەڵام یەكە ژمێریارییەكانی وەزارەت و دەستەكان ئاگاداركراونەتەوە كە تا ناوەڕاستی هەفتەی داهاتوو لیستەكە بە سیستەمی پەیرۆڵ ئامادەبكەن و پاشان ڕەوانەی بەغدا بكرێت.

ئاماژەی بەوەشكرد، بۆدابەشكردنی مووچە پێش جەژنی ڕەمەزان بەربەستەكان زۆرن، چونكە هێشتا هەرێم داهاتی نانەوتی مانگی دووی نەناردووە، هاوكات میزان موراجەعەی مانگی دووی ئامادە نەكردووە، ئەوە سەرەڕای ئەوەی دوای ناردنی لیست پێویستی بەكاتێكی زیاتر دەبێت تا وردبینی دەكرێت و پاشان پەسەند دەكرێت و دواتر بڕیاری تەمویل دەدرێت.

ئەو بەرپرسەی وەزارەتی دارایی هەرێم ئەوەشی خستەڕوو، بۆ مووچەی مانگی دوو (تەیف سامی) واژووی لەسەر ناردنی پارە نەكرد بۆ فەرمانبەرانی هەرێم، بەڵكوو لەلایەن بەڕێوەبەری ژمێریاری وەزارەتی دارایی عێراق پارە نێردرا، بەڵام دواتر وەزیری دارایی ئەو بەرپرسەی لە پۆستەكەی دوور خستەوە، بۆیە دیار نییە بۆ مانگی سێ‌ چۆن و بە چ شێوازێك بڕیار لەسەر ناردنی پارە دەدرێت بۆ هەرێم.