پەرلەمانتارێكی یەكێتی: ئەوەی حكومەتی هەرێم دەیكات سوكایەتیكردنە بە خوێنی شەهیدانی هەڵەبجە

SNN-عەلی حەمە سەعید

دوای ئەوەی حكومەتی هەرێم ڕاگەیاندن كە سبەی 16/3 دەوامی ئاساییە لە سەرجەم داموودەزگاكانی حكومەتی هەرێم، پەرلەمانتارێكی یەكێتی لە پەرلەمانی عێراق ئاماژە بەوەدەكات ئەو بڕیارەی هەرێم سوكایەتیكردنە بە خوینی شەهیدانی هەڵەبجە و جارێكی دیكە سەلماندی كە دژی خەڵكی هەڵەبجەن.

چرۆ حەمە شەریف، ئەندامی پەرلەمانی عێراق لە فراكسیۆنی یەكێتی بە SNN ڕاگەیاند: توشی شۆك بووین كاتێك زانیمان كە حكومەتی هەرێم سبەی یەك شەممە 16/3ی بە ڕۆژێكی ئاسایی داناوە و دەوامی فەرمانگەكانیشی كردووەتە دەوامی ئاسایی، لەكاتێكدا ئێمە پەرلەمانتارانی یەكێتی توانیمان پەرلەمانی عێراق بهینیینە ئەو بڕوایەی وەك ڕێزێك بۆ قوربانیانی تاوانی كیمیاباران ڕۆژی 16/3 بكاتە پشووی فەرمی.

ئاماژەی بەوەشكرد، ئەو بڕیارەی حكومەتی هەرێم سوكایەتیكردنە بە خوێنی شەهیدان و بەنادیدەگرتنی هەوڵەكانی پەرلەمانتارانی یەكێتییە كە توانیمان ئەو دەستكەوتە بەدەست بهێنین لەسەرتاسەری عێراق 16/3 بكرێتە پشووی فەرمی، بەڵام ماوەی 30 ساڵە حكومەتی هەرێم نەیتوانیوە ڕێز لە شەهیدەكانی بگرێت و ڕۆژێك یان بۆ بكاتە پشوو.

ئەو پەرلەمانتارەی یەكێتی ئەوەشی خستەڕوو، ئەگەر حكومەتی هەرێم بیانووی ئەوەیە گوایە دەبێت لە پەرلەمانی كوردستان بڕیار لەسەر پەسەندكردنی ئەو پشووە بدرێت ئەوا دەبێت سەرجەم بڕیارانەی دیكەش كە لە پەرلەمانی عێراقەوە دەركراون جارێکی دیكە لە پەرلەمانی كوردستان پەسەند بكرێنەوە وەك هەمواری پرۆژە یاسای بودجە و دەیان پرۆژە یاسای دیكە، بەڵام دیارە ئەوە تەنها بیانووە و وەك هەمیشە ئەمجارەش هەڵەبجە لەلایەن حكومەتەوە پشتگوێ‌ خرایەوە.