“لەدوای دەستبەكاربوونی پارێزگاری نوێ كەركوك گۆڕانكاری زۆری بەخۆیەوە بینیوە”
قه‌ڵاى کەرکوک | فۆتۆ: SNN
SNN-عەلی حەمە سەعید
نوێنەرێكی شاری كەركوك لە پەرلەمانی عێراق ئاماژە بەوەدەكات لەدوای دەستبەكاربوونی ئیدارەی نوێی كەركوك بەتایبەت پارێزگاری كەركوك، زۆرترین خزمەتگوزاری پێشكەش بە پارێزگاكە كردووە گۆڕانكاری تەواو لەبواری سیاسی و كۆمەڵایەتی و خزمەت و پێكەوەژیان و ئەمنی شارەكە بەدیدەكرێت.
سەباح حەبیب، یەكێك لە نوێنەرانی شاری كەركوك لە ئەنجومەنی نوێنەرانی عێراق بە SNNی ڕاگەیاند: ئەوەندەی تێبینیمان كردووە لەماوەی حەوت مانگی رابردوودا كە ئیدارەی نوێی پارێزگای كەركوك و پارێزگای كەركوك دەستبەكار بوون تواندراوە لە بوارەكانی خزمەتگوزاری و ئەمنی بە بێ جیاوازی خزمەت بە كەركوكییەكان بكرێت.
ئاماژەی بەوەشكرد، ئیداری نوێی كەركوك بەسەرۆكایەتی (رێبوار تەها) بێ جیاوازی خزمەتی سەرجەم پێكهاتەكان دەكات و پارێزگاری كەركوك وەك چۆن سەردانی گەڕەگە كوردەكان دەكات، سەردانی گەڕەكە عەرەب و توركماننشینەكانیش دەكات و خزمەتگوزارییان پێشكەش دەكات، لەكاتێكدا لە رابردوودا پارێزگاری كەركوك لەگەڵ ئەوەی لەرووی داراییەوە پارەیەكی زۆری لەبەر دەست بوو، بۆ خزمەتی خەڵكی كەركوك خەرجی نەدەكرد.
ئەو نوێنەرەی شاری كەركوك لە پەرلەمانی عێراق ئەوەشی خستەڕوو، ئیدارەی پێشووی كەركوك بەتایبەت پارێزگارجیاوازی لەنێوان گەڕەكە كورد نیشینەكان و عەرەب نشینەكان دروستكردبوو، بەڵام بەهەوڵی پارێزگاری كەركوك و فراكسیۆنی یەكێتی لەئەنجومەنی پارێزگای كەركوك گۆڕانكاری تەواو لەبواری سیاسی و كۆمەڵایەتی و خزمەت و پێكەوەژیان و ئەمنی شارەكە كراوەو ئەوەش كەركوكییەكانی دڵخۆش كردوە.
