SNN-
ئەمڕۆ ئەنجومەنی وەزیران کۆدەبێتەوە و چارەنوسی ئەو فەرمانبەرانە یەکلادەکاتەوە کە لەمانگی حەوتی ساڵی رابردوەوە بەهۆی جێگیربونی میلاکەوە مووچەیان بۆ نەبەستراوە، درێژکردنەوەی داشکاندنی سزاکانی سەرپێچی هاتوچۆ و گرفتی دەرچوانی کۆلیژی پزیشکیی گشتیی زانکۆ حکومییەکان بۆ ساڵی 2024 تاوتوێ دەکرێن.
سەرچاوەیەک لە ئەنجومەنی وەزیران بە میدیای گۆڕانی راگەیاندووە، کاتژمێر 11:00ی ئەمڕۆ ئەنجومەنی وەزیران بۆ تاوتوێکردنی سێ پرس کۆدەبێتەوە.
لە تەوەری یەکەمدا، وەزیری ناوخۆی هەرێم پێشنیاری وەزارەتەکەی بۆ درێژەدان بە بڕیاری داشکاندنی ڕێژەی 20% لە سزای سەرپێچی هاتوچۆ بۆ شەش مانگی دیکە پێشکەشدەکات بۆئەوەی تاکو 1-6-2025 بەردەوام بێت.
لە تەوەری دووەمیشدا، وەزیری دارایی و ئابوری راپۆرتێک پێشکەشدەکات کە تایبەتە بە یەکلاکردنەوەی چارەنوسی ئەو فەرمانبەرانەی لەسەر میلاکی دامەزراوەکانی حکومەتی هەرێم بەشێوەی هەمیشەیی و گرێبەست دامەزراون، بەڵام لە مانگی حەوتی ساڵی رابردوەوە بەهۆی جێگیربونی میلاکەوە موچەیان بۆ نەبەستراوە.
، لە تەوەری سێیەمدا د. سامان بەزرنجی وەزیری تەندروستی حکومەتی هەرێم بابەتی دەرچوانی کۆلێژی پزیشکی گشتی زانکۆ حکومییەکان بۆ ساڵی 2024 دەخاتەڕوو، هاوکات داوای دامەزراندنی پزیشک و کارمەندانی تەندروستی دەکات بۆ پڕکردنەوەی ئەو کورتهێنانەی لە میلاکاتیان دروستبووە.
