ئیرادەیەكی بەهێز نییە بۆ چارەسەركردنی كێشەكانی هەولێر و بەغدا، هەرێم بیانوو دەدات بەعێراق

SNN-عەلی حەمە سەعید

لەگەڵ ئەوەی ناو بەناو هەردوو حكومەتی هەرێم و عێراق باسە لە ڕێككەوتن و كۆتایهێنان بە كێشەكانی نێوان هەردوولا دەكەن، بەڵام بەوتەی پەرلەمانتارێكی كورد هیچ ئیرادەیەكی بەهێز نییە بۆ كۆتایی هێنان بەكێشەكان وهەرێم بیانوو دەدات بەدەستەوە بۆ نەناردنی مووچە.

داراسێكانیانی، ئەندامی لیژنەی یاسایی لە ئەنجومەنی نوێنەرانی عێراق بە SNNی ڕاگەیاند: بەداخەوە كە تا ئێستا نەتواندراوە بە تەواوی گرفتەكانی نێوان هەولێر و بەغدا بە تەواوی چارەسەر بكرێت، بەڵگەشمان بۆ ئەمە ئەوەیە كە ناردنی مووچە لەكاتی خۆیدا دوادەكەوێت لەكاتێكدا وابڕیار بوو لەسەرەتای ئەمساڵەوە مانگانە لەكاتی خۆیدا مووچە ڕەوانە بكرێت.

ئاماژەی بەوەشكرد، ئێمەی نوێنەرانی كورد لە بەغدا و تەنانەت هاووڵاتیانیش گەیشتووینەتە ئەو بڕوایەی كە ئیرلدەیەكی بەهێز نییە بۆ چارەسەركردنی گرفتەكانی نێوان هەولێر و بەغدا، چونكە زۆر جار لەلایەن هەرێمەوە بیانوو دەدرێتە بەغدا بۆ ئەوەی مووچە لەكاتی خۆیدا نەنیرێت، چ لەڕووی درەنگ ناردنی لیستی مووچە بێت یاخود لە ڕووی كەمی ناردنەوەی ئەو داهاتەی كە دەبێت هەرێم بۆ عێراقی بنێرێت.

ئەو ئەندامەی لیژنەی یاسایی لە ئەنجومەنی نوێنەرانی عێراق ئەوەشی خستەڕوو، خەریكە ڕێككەوتنەكانیش بێ‌ بایەخ كراون لەنێوان هەرێم و عێراق، چونكە لەسەرەتای ئەمساڵەوە وابڵاوكرایەوە كە ڕێككەوتنی كۆتایی كراوە و مانگانە لەكاتی خۆیدا پارە ڕەوانە دەكرێت، بەڵام بینیمان وادەرنەچوو، ئێستاش دیار نییە كەی مووچەی مانگی سێ‌ ڕەوانە دەكرێت لەكاتێكدا نزیك بووینەتەوە لە كۆتایی مانگ و هاتنی جەژنی رەمەزان.