لەسەر داوای پەرلەمانتارێكی یەكێتی وەزیری ژینگەی عێراق پێنج هەزار نەمام بۆ دەڤەری ڕاپەڕین دەنێرێت
SNN-عەلی حەمەسەعید
لەسەر داوای پەرلەمانتارێكی فراكسیۆنی یەكێتی لەئەنجومەنی نوێنەرانی عیراق، وەزیری ژینگەی عێراق پێنج هەزار نەمام ڕەوانەی دەڤەری راپەڕین كرد و بەسەر سەرجەم شارەوانییەكانی ناوچەكەدا دابەشكران.
بەدریە حسێن، ئەندامی فراكسیۆنی یەكێتی لەئەنجومەنی نوێنەرانی عێراق بە SNNی راگەیاند: بەمەبەستی زیاتر خزمەتكردنی هاووڵاتیانی سنوری ئیدارەی ڕاپەڕین و پاراستنی ژینگە و سروشتی ناوچە جیاوازەكانی كوردستان، داواكارییەكم ئاستەی وەزیری ژینگەی عێراق كرد بەمەبەستی دابینكردنیژمارەیەك نەمام بۆ دەڤەری ڕاپەڕین.
ئاماژەی بەوەشكرد، لەوەڵامی ئەو داواكارییەكاندا، وەزیری ژینگەی عێراق بڕیاریدا بە دابینكردن و ناردنی پێنج هەزار نەمامی جۆراوجۆر بۆ دەڤەری راپەڕین، هاوكات ئەو هەوڵەی ئێمە بەڵكو بەشێكە لە پڕۆژەیەكی گەورەتر بۆ پاراستنی ژینگە و جوانكردنی ناوچەكە.
” ئەو پەرلەمانتارەی یەكێتی ئەوەشی خستەڕوو، بەمەبەستی ئەوەی زۆرترین ناوچە سود لەو نەمامانە وەربگرن و هاوكات لە شوێنی گونجاو بنێژرێن، سەرجەم نەمامەكانمان بەسەر شارەوانییەكاندا دابەشكردووە، ئەوەش كاریگەری زۆر باشی دەبێت لەسەر كەمكردنەوەی كاریگەرییەكانی گۆڕانی كەشوهەوا و هەروەها سەوزكردنی ژینگەی هەرێمی كوردستان و ناوچەكە.
