ئەحمەد شەرع داوا لە روسیا دەكات بەشار ئەسەدی رادەستبكاتەوە

SNN-

ئەحمەد شەرع، سەرۆکی کاتی سوریا داوای لە ڤلادیمێر پوتین-ـی سەرۆکی روسیا کردوە بۆئەوەی بەشار ئەسەد رادەست بکەنەوە تا لە سوریا دادگایی بکرێت.

سەبارەت بە ئەگەری ڕادەستکردنی بەشار ئەسەد لەلایەن مۆسکۆوە بە دیمەشق، ئاژانسی ڕۆیتەرز لە زاری سەرچاوەیەکی ڕوسییەوە بڵاویکردوەتەوە، روسیا ڕازی نابێت بە ڕادەستکردنی ئەسەد.

دەشڵێت:” شەرع ئەو خاڵەی كردوەتە مەرج بۆ ئاسایی كردنەوەی پەیوەندیەكان لەگەڵ روسیا و دەیەوێت ئەسەد لە ناو سوریا دادگایی بكرێت.

ئەوەش لەكاتێكدایە، رۆژی پێنجشەممە پوتن قسەی لەگەڵ ئەحمەد شەرع كرد و پشتیوانی خۆی بۆ سوریا دەربڕی لەگەڵ ئەوەشدا ئارەزووی وڵاتەكەی بۆ دارشتنەوەی پەیوەندیەكان لەگەڵ دیمەشق دەربڕی.

پێشتر ئاژانسی رۆیتەرز لەزاری سەرچاوەکانییەوە بڵاویکردەوە، ئەحمەد شەرع داوای لە روسیا کردوە ئەو پارانەیان بۆ بگەڕێنێتەوە کە لەلایەن سەرۆکی لەکارلادراوی سوریا لە مۆسکۆ دانراوە، بەڵام روسیا رایگەیاندوە ئەسەد هیچ پارەیەکی لە بانکەکانی ئەو وڵاتە دانەناوە.