SNN-
بە تۆمەتى رفاندن و دەستگیرکردن و کوشتنی ئەمریکییەکان وەزارەتی گەنجینەی ئەمریکا، سزای بەسەر سێ بەرپرسی ئێرانیدا سەپاند.
وەزارەتی گەنجینەی ئەمریکا لە راگەیەندراوێکدا بڵاویکردەوە، سزایان بەسەر سێ بەپرسی ئێراندا سەپاندووە، کە لەناو وەزارەتی ئیتڵاعاتی ئەو وڵاتە کاردەکەن، سزاکەش لە چوارچێوەی سیاسەتی زۆرترین فشاردایە.
لەناو لیستی سزاکانی ئەمریکادا رەزا ئەمیری موقەدەم، غوڵام حسێن محەمەدیان و تەقی دانشوەر هەیە، کە لە ناو وەزارەتی ئیتڵاعاتی ئێران کاردەکەن و ئەو سێ کەسە دەستیان لە رفاندن و دەستگیرکردن و کوشتنی ئەو ئەمریکییانەدا هەبووە، کە سەردانی ئێرانیان کردووە، لەوانە رۆبێرت لێڤینسۆن، کارمەندی ئێف بی ئای ئەمریکا.
رۆبێرت لێڤینسۆن لە ئازارى 2007ەوە لە دوورگەی کیشی ئێران ونبووە، بەڵام باس لە کوشتنی لە خاکى ئێراندا دەکرێت، وەزارەتی دەرەوەی ئێرانیش پێشتر رایگەیاندبوو، ئەو کەسە ئێرانی بە جێهێشتووە.
وەزارەتی گەنجینەی ئەمریکا بە پێی بڕیاری ژمارە 14078ی ئەمریکا کە تایبەتە بە لێپرسینەوە لەو لایەنانەی هاوڵاتیانی ئەمریکا بە بارمتە دەگرن بۆ قازانجی خۆیان سزای بەسەر ئەو بەرپرسە هەواڵگرییانەی ئێراندا سەپاندووە.
