دۆناڵد ترەمپ: لەگەڵ بەرپرسانی ئێرانی لە دانوستانداین

SNN

سەرۆکی ئەمریکا ئاشکرای کرد کە لە گەڵ دەسەڵاتدارانی تاران دەستیان بە دانوستان کردووە و هەڕەشەی ئەوەشی کرد، کە ئەگەر نەگەنە ئەنجام ئێران بۆردومان دەکەن.

دۆناڵد ترەمپ سەرۆکی ئەمریکا ئاشکرای کرد، کە لەگەڵ بەرپرسانی ئێرانی لە دانوستاندان و خوازیاری ئەوەیە لە رێگەی دانوستانەوە پرسی بەرنامەی ئەتۆمی تاران چارەسەر بکرێت و ئەوە یەکلابکرێتەوە کە ئێران ئامانجی دروستکردنی بۆمبی ئەتۆمی نییە.

ترەمپ لە چاوپێکەوتنێکدا لە گەڵ کەناڵی NBC ئەوەشی خستەڕوو، کە ئەگەر ئەو ئەنجامەی دەیانەوێت لە رێگەی دانوستانەوە بەدەستی نەهێنن، بە جۆرێک ئێران بۆردومان دەکەین، کە هەرگیز هاوشێوەی نەبووبێت.

پێشتریش سەرۆکی ئەمریکا رایگەیاندبوو، ئەگەر لەگەڵ ئێران لە رێگەی گفتوگۆوە نەگەنە ئەنجام، شتی زۆر زۆر خراپ روودەدات.

لەماوەکانی رابردوودا ترەمپ لە نامەیەکدا بۆ عەلی خامنەیی رابەری باڵای ئێران داوای کردبوو لە رێگەی دانوستانەوە پرسی دۆسیەی ئەتۆمی ئەو وڵاتە و چەند پرسێکی دیکە چارەسەر بکەن، بە پێچەوانەوە پەنا بۆ بژاردەی سەربازی دەبەن.

لای خۆیانەوە بەرپرسانی ئێرانی وێڕای ئەوەی بە فەرمی وەڵامی نامەکەیان دایەوە، رایانگەیاند، لە ژێر گوشاردا دانوستان ناکەن و بۆ ئەم قۆناغە ئامادەن بە شێوەی ناڕاستەوخۆ گفتوگۆ لەگەڵ واشنتن بکەن.