وتەبێژی یەكێتی خانەنشینان: تائێستا هیچ خانەنشینێك پاداشتی خانەنشینی وەرنەگرتووەو هۆكارەكەشی نازانین

SNN-عەلی حەمە سەعید

وتەبێژی یەكێتی خانەنشینانی هەرێم ئاماژە بەوەدەكات بەگوێرەی یاسا دەبوو ئەو خانەنشینانەی سەرەتای ئەمساڵ خانەنشین بوون پاداشتی خانەنشینی شەش مانگیان پێبدرایە تا ئەوكاتەی مامەڵەكانیانە تەواو دەبوو، بەڵام زیاتر لە 20 هەزار خانەنشین چوارمانگە مووچەیان وەرنەگرتووە و دۆخی ژیانیان خراپە.

سادق شێخ عوسمان، وتەبێژی یەكێتی خانەنشینانی كوردستان، بە SNNی ڕاگەیاند: دوای جێبەجێكردنی یاسای خانەنشینی یەكگرتوو لەهەرێمی كوردستان لە سەرەتای ئەمساڵەوە زیاد لە 25 هەزار فەرمانبەر پێكەوە خانەنشین كران، ئەو خانەنشینكراوانە لە مانگی 11 ی ساڵی ڕابردووەوە هیچ مووچەیەكیان وەرنەگرتووە كە زیاد لە چوار مانگ دەكات.

ئاماژەی بەوەشكرد، بەگوێرەی یاسای خانەشینی فەرمانبەرێك خانەنشین دەكرێت، دەبێت مووچەی بنەڕەتی شەش مانگی وەك پاداشتی خانەنشینی پێبدرێت، تا ئەوكاتەی مامەڵەی خانەنشینبوونەكەی تەواو دەبێت، بەڵام لە هەرێمی كوردستان ئەو پاداشتەش بەهیچ خانەنشینێك نەدراوە و ناشزانین هۆكارەكەی چییە.

وتەبێژی یەكێتی خانەنشینانی كوردستان ئەوەشی خستەڕوو ئەو خانەنشینانەی كە ماوەی چوار مانگە هیچ مووچەیەكیان وەرنەگرتووە ژمارەیان زیاد لە 20 هەزار خانەنشینە و ئەوانیش ماڵ و منداڵیان هەیە و دۆخی ژیانیان خراپە، بۆیە دەبێت پەلە بكرێت لە تەواوكردنی مامەڵەكانیان یاخود پێدانی پاداشتی شەش مانگی خانەنشین بوونیان كە بە (ئیكرامییە)ی خانەنشینی ناسراوە.