کۆمەڵ و یەکگرتوو دژی ئیسرائیل هەڵوێست دەگرن و زنجیرەیەک چالاکی ئەنجام دەدەن

SNN

لە راگەیەندراوێکی هاوبەشدا کۆمەڵی دادگەریی کوردستان و یەکگرتووی ئیسلامیی کوردستان پشتیوانیی خۆیان بۆ خەڵکی غەزە دەربڕیوە و ئیدانەی هێرشەکانی سوپای ئیسرائیلیان کردووە و بڕیاریان داوە لە پێناو پشتیوانی لە دۆزی فەلەستینو دانیشتوانی کەرتی غەزە لە رۆژانی داهاتوودا زنجیرەیەک چالاکی هاوبەش ئەنجام بدەن.

دەقی راگەیەندراوەکەیان

بە ناوی خودای بەخشندەی

میهرەبان

ڕاگەیەندراوی هاوبەشی كۆمەڵی دادگەریی كوردستان و یەكگرتووی ئیسلامیی كوردستان سەبارەت بە كۆمەڵكوژییەكانی غەززە��.

لیژنەی هاوبەشی نێوان یەكگرتووی ئیسلامیی كوردستان و كۆمەڵی دادگەریی كوردستان كۆبوونەوەیەكی تایبەتی ساز كرد سەبارەت بە وەرگرتنی هەڵوێست بەرامبەر تاوانەكانی كۆمەڵكوژیی ڕژێمی داگیركەری زایۆنی دژ بە خەڵكی غەززە.

بۆ زیاتر لە ساڵ و نیوێكە هێرش و پەلامارەكان بۆ سەر كەرتی غەززە درێژەی هەیە و هێزەكانی سوپای داگیركەری زایۆنی بەشێوەیەكی بەرنامەبۆداڕێژراو و بە دڕندانەترین شێوە، بەردەوامە لە بەئامانجگرتنی خەڵكی بێ دفاع و ژن و منداڵ و شوێنەگشتییەكانی وەكوو نەخۆشخانە و قوتابخانە و مەڵبەندەكانی پەنابەران و ئاوارەكان و شوێنە ئایینییەكان و هەموو هۆكارێكی ژیان و شارستانیی كەرتی غەززە.

وێڕای سەپاندنی گەمارۆ و قەدەغەكردنی گەیشتنی ئاو و خۆراك و دەرمان و هاوكارییە مرۆییەكان، مەخابن لەم ماوەیەدا كۆمەڵكوژییەكە پێی ناوەتە قۆناغ و دۆخێكی زۆرمەترسیدارەوە.

ئێمە وەك هەمیشە، وەكوو ئەركێكی ئایینی و مرۆیی، زۆر بە توندی ئیدانەی ئەو تاوانە دژ بە مرۆڤایەتییانە دەكەین كە سوپای داگیركەر ئەنجامی دەدات، كە پێشێلكردنی ئاشكرای هەموو یاسا و ڕێسایەكی ئاسمانی و مرۆییە.

هەروەها ئیدانەی ئەو پشتیوانییە دارایی و لۆجستییە دەكەین كە دەوڵەتانی زلهێز لە داگیركەری دەكەن، كە بەبێ پشتیوانیی ئەوان، ناتوانێ ئەو پێشێلكارییە نامرۆڤانانە ئەنجام بدات.

لەڕاستیدا ئەوەی كە لە غەززە ڕوو دەدات، تەنیا شەڕ و كێشەیەكی چەكداری و سیاسیی نێوان دوو لایەن نییە، بەڵكو گەورەترین تاوانی دژ بە مرۆڤایەتییە كە بە بەرچاوی كۆمەڵگەی نێودەوڵەتی و بێدەنگی و بێهەڵوێستیی دامەزراوەكانی پەیوەندیدار بە پاراستنی مافەكانی مرۆڤەوە ئەنجام دەدرێت.

لێرەدا جەخت دەكەینەوە لەسەر ئەوەی كە نەتەوە یەكگرتووەكان و ئەنجومەنی ئاسایش و دەوڵەتە عەرەبی و ئیسلامییەكان، بە زووترین كات هەموو جۆرە گوشارێكی پێویست بخەنە كار، بۆ ڕاگرتنی ئەو كۆمەڵكوژییە و كردنەوی دەروازەكانی گەیاندنی هاوكارییە مرۆییەكان بەشێوەیەكی فراوان بۆ خەڵكە ئاوارەكە، هەروەها ڕێگرتن لە پیلان و هەوڵەكانی ڕاگواستنی زۆرەملێی دانیشتوانەكەی.

ڕاستییەكی حاشاهەڵنەگرە كە بەرەنگاربوونەوەی ستەم و بەرگریكردن لە ستەملێكراوان، لە هەرنەتەوە و نەژاد و ئایینێك بن، ئەركێكی ئینسانی و ئیسلامی و ئەخلاقیی ئێمەیە وەكوو خەڵكی كوردستان، كە ساڵانێكی زۆر خۆمان گیرۆدەی ستەم و تاوانی كۆمەڵكوژی و ڕاگواستن بووین، بۆیە لە هەموو لایەك زیاتر هەست بە ئێش و ئازاری لێقەوماوان دەكەین و بە هەموو توانایەك ئامادەی هەموو جۆرە هاوكاری و پشتیوانییەكین وەك ئەركێكی ئیسلامی و ئەخلاقی و ئینسانیی خۆمان بۆ خەڵكی ستەمدیدەی غەززە.

لەو پێناوەدا داوا لە دامەزراوە نێودەوڵەتییەكان دەكەین، هەرچی زووترە سنوورێك بۆ ئەو كۆمەڵكوژی و گەمارۆ زاڵمانە دابنێن و بەپێی بڕیارەكانی دادگای تاوانەكان و لێبوردنی نێودەوڵەتی لێكۆڵینەوەی جیدی دەست پێ بكرێت و ئیجرائاتی پێویست دەرهەق بە دەسەڵاتدارانی ڕژێمی زایۆنی ئەنجام بدرێت.

جارێكی تر زۆر بە توندی ئیدانەی ئەو بێهەڵوێستی و بێدەنگییە گوماناوییە دەكەین كە ناگونجێت لەگەڵ بەهاو پێوەرەكانی مافی مرۆڤ و یاسا و ڕێسا نێودەوڵەتییەكان، داوا دەكەین دەستبەجێ كۆتایی بەو مەرگەساتە بهێنرێت كە بەرامبەر خەڵكی بێ دیفاعی غەززە ئەنجام دەدرێت.

هەروەك چۆن لە ڕابردوو هەردوولا پشتیوان و هاوسۆز و هاوكار بوون بۆ دۆزی ڕەوای فەلەستین و دانیشتوانی كەرتی غەززە بە ماددی و مەعنەوی. هەر

لە كۆبوونەوەكەدا بڕیار درا كە لە ڕۆژانی داهاتوو زنجیرەیەك چالاكیی هاوبەش لەو پێناوەدا ئەنجام بدرێت.

یەكگرتووی ئیسلامیی كوردستان          كۆمەڵی دادگەریی كوردستان