لەگەڵ مووچەی مانگی چوار هەزار و 500 خانەنشین چوار مووچە پێكەوە وەردەگرن

SNN-عەلی حەمە سەعید

وتەبێژی یەكێتی خانەنشینانی كوردستان ئاشكرایدەكات، لەگەڵ دابەشكردنی مووچەی مانگی چواری خانەنشینان، زیاد لە هەزار 500 خانەنشین كە لەسەرەتای ئەمساڵەوە خانەنشین بوون چوار مووچە پێكەوە وەردەگرن و مانگەكانی داهاتووش ژمارەكە زیاتر دەبێت.

سادق شێخ عوسمان، وتەبێژی یەكێتیی خانەنشینانی كوردستان بە SNNی ڕاگەیاند:  ماوەی چەند هەفتەیەكە مامەڵەی خانەنشینی لە هەموو بەڕێوەبەرایەتییەكان رایی دەكرێت و ئەوەش وایكردووە، پرۆسەكە خێرا بێت، هاوكات نزیكەی 16 هەزار خانەنشین لە سنووری پارێزگای سلێمانی هەن كە لەدایكبووی ساڵانی 1962، 1963 و 1964 لەسەرەتای ئەمساڵەوە بەهۆی جێبەجێكردنی یاسای خانەنشینی یەكگرتوو خانەنشینكران.

ئاماژەی بەوەشكرد، لە كۆی ئەو 16 هەزار خانەنشینەی سنوری پارێزگای سلێمانی، نزیكەی 11 هەزاریان مامەڵەیان لە بەڕێوەبەرایەتیی خانەنشینیی سلێمانی بۆ دەكرێت و ئەوانی دیكەش لە ناوچەكانی دەوروبەری سلێمانی، هەرچەندە سەرەتا پڕۆسەی تەواوكردنی مامەڵەكە بە هێواشی بەڕێوەدەچوو، بەڵام ئێستا دەسەڵات بە بەڕێوەبەرایەتییەكانی خانەنشینی لە پارێزگا و ئیدارە سەربەخۆكان دراوە بۆ تەواوكردنی مامەڵەی خانەنشینی یەكگرتوو، ئەمەش پرۆسەكەی خێراتر كردووە.

وتەبێژەكەی یەكێتی خانەنشینانی كوردستان ئەوەشی خستەڕوو، لەگەڵ دابەشكردنی مووچەی مانگی چوار، زیاد لە هەزار و 500 خانەنشین كە مامەڵەكانیان تەواو بووە چوار مووچەی خانەنشینی بەسەریەكەوە وەردەگرن و لەمانگەكانی داهاتووش ژمارەكە زیاتر دەكات.