دوامۆڵەت بۆ گەڕانەوەی عومرەكاران راگەیەندرا، بەپێچەوانەوە 35 ملیۆن غەرامە دەكرێن

SNN-عەلی حە مەسەعید

بەڕێوەبەری راگەیاندنی حەج و عومرەی هەرێم ئاماژە بەوەدەكات تا ڕۆژی 29 ی ئەم مانگە هەر كەسێك بەناوی عومرە یان هەر جۆرە مەبەسێكی دیكە ڕۆشتبێتە سعودییە، دەبێت بگەڕێتەوە، بە پێچەوانەوە بڕی 35 ملیۆن دینار غەرامە دەكرێن. 

كاروان ستوونی، بەڕێوەبەری راگەیاندنی حەج و عومرەی هەرێم بە SNNی ڕایگەیاند: بە بڕیاری وەزارەتی حەجی سعودیە تا 29ی ئەم مانگە هەركەسێك لەو وڵاتە نەگەڕێتەوە بە نزیكەی 35 ملیۆن دیناری عێراقیی سزا دەدرێت، هاوكات بڕیارەكەی سعودیە هەموو تاكەكان و كۆمپانیاكان ناچار دەكات، بەر لەكاتی دیاریكراو بگەڕێنەوە وڵاتەكانیان.

ئاماژەی بەوەشكرد، ئەو پارەیەی وەك پێبژاردن لە هەر كەسێك وەربگیرێت بۆ سعودیەیە و هیچ پەیوەندی بە هەرێمی كوردستانەوە نییە، هاوكات ئامادەكارییەكان بۆ رێوڕەسمەكانی حەجی ئەم ساڵ بەردەوامن، ئێستا لە چوار پارێزگا و چوار ئیدارەی سەربەخۆی هەرێمی كوردستان پێدانی ڤاكسین بۆ ئەو كەسانە دەستیپێكردووە كە ئەم ساڵ دەچنە حەج

بەڕێوەبەری راگەیاندنی حەج و عومرەی هەرێم ئەوەشی خستەڕوو، ڤاكسینەكە بۆ رێگرییە لە تووشبوون بە نەخۆشییە گوازراوەكان و پەتا وەرزییەكان، بە هاوئاهەنگیی وەزارەتی تەندروستی  ڤاكسینەكان دەدرێن، هاوكات هەركەسێك ڤاكسین وەردەگرێت دەفتەرێكی پێدەدرێت كە تێیدا وەك بەڵگەنامە بۆ وەرگرتنی ڤاكسین لە گەشتەكەیدا بەكاری دەهێنێت.