لە ماوەی تەنها سێ کاتژمێردا 46 بومەلەرزە لە ئیستانبوڵیداوە

SNN

بەهۆی ترس لە بومەلەرزەوە بەشێک لە هاووڵاتیانی ئیستانبوڵ لە دەرەوەی ماڵەکانیان دەمێننەوە، هاوکات دەستەی کارەسات و بومەلەرزەزانی تورکیا رایدەگەیەنێت، لە ماوەی سێ کاتژمێردا 46 جار بومەلەرزە لە ئیستانبوڵی داوە.

دەستەی ئافاد تایبەت بە کارەساتە سروشتییەکان و حاڵەتی لەناکاو لە تورکیا رایدەگەیەنێت، لە رۆژی چوارشەممەی رابردوودا تەنها لەماوەی سێ کاتژمێردا، 46 جار بومەلەرزە داویەتیی لە شارەکە، لە ماوەی کەمتر لە 24 کاتژمێردا 240 بومەلەرزە ئیستانبوڵیان هەژاندووە.

ئاماژە بەوەکراوە، یەکەم بومەلەرزە کاتژمێر 12:13 خولەک بووە بە کاتی ناوخۆی تورکیا و گوڕەکەی 3.9 پلەی رێختەر بووە، نزمترین گوڕی بومەلەرزەش 1.6 پلەی رێختەر بووە، بەرزترین گوڕیش 6.2 پلە بووە کە کاتژمێر 12:49 خولەک بووە.

هاوکات، بەشێک لە هاووڵاتیانی ئیستانبوڵ لە ترسی بومەلەرزەکان ماڵەکانیان بەجێهێشتووە و شەو و رۆژیان لەسەر شەقام و پارکەکان کردووەتەوە.

دەستەی ئافاد ئاشکرایدەکات، بەهۆی ئەو بومەلەرزانەوە تاوەکو ئێستا هیچ حاڵەتێکی گیانلەدەستدانیان پێ نەگەیشتووە.