سبەی یەكێتی و پارتی لە سلێمانی كۆدەبینەوە بۆ باسكردن لە دابەشكردنی پۆستەكان
لۆگۆى یهكێتیی نیشتمانیی كوردستان و پارتى دیموكراتى كوردستان | فۆتۆ: SNN
SNN-عەلی حەمە سەعید
وابڕیارە سبەی یەكشەممە جارێكی دیكە شاندی باڵای دانوستاندنكاری پارتی دیموكراتی كوردستان و یەكێتیی نیشتمانی كوردستان لە شاری سلێمانی كۆببنەوە، كۆبوونەوەكەش تایبەت بە قسەوباسكردن لەسەر لەسەر شێوازی دابەشكردنی پۆستەكانی كابینەی نوێی حكومەتی هەرێم.
بەگوێرەی ئەو زانیارییانەی لەسەرچاوەیەكی نزیك لە شاندی باڵای دانوستانكاری یەكێتی بە SNNدراون ئەوەخراوەتەڕوو، ئامادەكاری كراوە بۆ ئەوەی سبەی شاندی باڵای دانوستانكاری یەكێتی نشتیمانی كوردستان و پارتی دیموكراتی كوردستان لە مەكتەبی سیاسی یەكێتی لە شاری سلێمانی گەڕێكی دیكەی كۆبوونەوەكانیان ئەنجام بدەن، كە تیایدا باس لەدابەشكردنی پۆستە حكومییەكانی كابینەی نوێ دەكرێت.
ئاماژەی بەوەشكرد، هەرچەندە وابڕیار بوو كە لە چەند ڕۆژی ڕابردوودا ئەوكۆبوونەوەیە بەڕێوە بچوویایە، بەڵام بەهۆی ئەوەی لە سلێمانی دیداری یەكێتی بەڕێوەچوو هاوكات لە شاری هەولێریش نزای نشتیمانی بەڕیوەچوو، بۆیە كۆبوونەوەكە بۆ سبەی یەك شەممە دواخراوە.
ئەو سەرچاوەیەی نزیك لە شاندی بالای دانوستانكاری یەكێتی ئەوەشی خستەڕوو، لە كۆبوونەوەكەی سبەی گفتوگۆكان دەچنە قۆناغێكی نوێ وە، چونكە هەردوو شاند باس لە وردەكاری دابەشكردنی پۆستە حكومییەكان دەكەن لە نێوان هەردوولادا، هاوكات ئەگەریش هەیە باس لە بەشداریپێكردنی پێكهاتەكان بكرێت لە كابینەی نوێ لەگەڵ ئەو حزبانەی كە خوازریارن بەشداری كابینەكە بكەن وەك پارتی سۆسالیست دیموكراتی كوردستان.
