ئێران: هێرشێکی ئەلەکترۆنیمان پوچەڵکردەوە

SNN

کۆمپانیای ژێرخانی پەیوەندییەکانی ئێران ئاشکرایکرد، دوێنێ هێرشێکی گەورەی ئەلیکترۆنی کرابووە سەر ژێرخانی پەیوەندییەکانی وڵاتەکەیان بە سەرکەوتووانە ئەو هێرشەیان پوچەڵکردووەتەوە.

ئەمڕۆ دووشەممە 28ی نیسان، ئاژانسی هەواڵی تەسنیمی نیمچە فەرمی ئێران لە زاری بەرپرسی کۆمپانیای ژێرخانی پەیوەندییەکانی ئەو وڵاتەوە رایگەیاند، یەکێک لە بەرفراوانترین و ئاڵۆزترین هێرشە ئەلیکترۆنییەکان بۆ سەر ژێرخانی ئەو وڵاتە، دوێنێ یەکشەممە پوچەڵ کرایەوە.

ئاماژەی بەوەکردووە، ئەو هێرشە ئەلیکترۆنییە دوای ئەوە هات کە ڕۆژی شەممەی رابردوو تەقینەوەیەکی بەرفراوان بەندەری ڕەجایی هەژاند و بەهۆیەوە 40 کەس گیانیان لەدەستدا و نزیکەی هەزار کەسی دیکەش برینداربوون.

مەسعود پزیشكیان، سەرۆک کۆماری ئێران لە میانی دیدارێکی لەگەڵ بەرپرسان کە لە تەلەفزیۆنی دەوڵەتی ئێران پەخش کرابو، وتی، “دەبێ هۆکاری تەقینەوەکە بزانین”.

هاوکات، هیچ کەسێک لە ئێران پێشنیاری ئەوەی نەکردوە کە تەقینەوەکە دەرئەنجامی هێرشێک بووە

یەکەمین لێدوانی ئیسرائیل لەسەر تەقینەوە گەورەکەی ڕۆژی شەممەی بەندەرەکەی گرتەوە، لەلایەن سوپای ئیسرائیلەوە بو، ڕۆژنامەی ماریڤی ئیسرائیلی لە زاری بەرپرسانی سەربازییەوە بڵاویکردەوە، “سوپای ئیسرائیل هیچ پەیوەندییەکی بەو تەقینەوەیە نییە کە لە ئێران ڕویداوه‌”.