کشتوکاڵی گەرمیان: نزیكەی لە%40 ی ئەو زەویانەی كە بەگەنم چێندراون بەرهەمەکانیان باش نییە بەهۆی كەم بارانییەوە

SNN-عەلی حەمەسەعید

بەهۆی هەڵكەوتەی شوێنی جوگرافی و جیاوازی پلەكانی گەرما و بڕی باران بارین، ساڵانە لە سنوری ئیدارەی گەرمیان گەنم زووتر دەچندرێت و هاوكات وەزری دروێنەش زووتر دەستپێدەكات، وتەبێژی بەڕێوەبەرایەتی كشتوكاڵی گەرمیانیش ئاشكرایدەكات كە لە چەند شوێنێكی گەرمیان بەهۆی پێگەیشتنی گەنمەوە دروێنە دەستیپێكردووە.

ستار عەلی، وتەبێژی بەڕێوەبەرایەتی كشتوكاڵی گەرمیان، بە SNNی ڕاگەیاند: بەهۆی ئەوەی ساڵانە جیاواز لە ناوچەكانی دیكەی هەرێمی كوردستان وەرزی كێڵان و چاندنی گەنم زووتر دەستپێدەكات و هاوكات پلەكانی گەرما و كەشوهەوای ناوچەكەش جیاوازە لەناوچەكانی دیكە بۆیە پێگەیشتنی گەنم و جۆ لە سنورەكە پێش ناوچەكانی دیكە دەكەوێت، بۆیە لە چەند شوێنێكی ناوچەكەمان بەهۆی پێگەیشتنی گەنمەوە دروێنەكردنی گەنم دەستیپێكردووە.

ئاماژەی بەوەشكرد، دۆخی بەرهەمی گەنم لەمساڵدا بەسەر دووناوچەدا دابەشبووە، بەجۆرێك دۆخی دانەوێڵە لە باكوور و باكووری رۆژهەڵاتی گەرمیان تاڕادەیەك باشە، بەڵام لە ناوچەی باشوور و باشووری رۆژئاوا بەهۆی كەمی باران بارینەوە بەرهەمی گەنم وەك پێویست نییە و تاڕادەیەك وشكە ساڵی تێدا تۆماركراوە.

وتەبێژی كشتوكاڵی گەرمیان ئەوەشی خستەڕوو، لە سنووری ئیدارەی گەرمیان ساڵانە زیاد لە 400هەزار دۆنم بە گەنم دەچێندرێت و زۆرینەی پشت بە باران دەبەستێت، ئەمساڵیش نزیكەی لە%40 ی ئەو زەویانەی كە بەگەنم چێندراون بەرهەمی گەنمەكانیان باش نییە بەهۆی كەمبارانییەوە.