تا ساڵی 2028 داهاتی نانەوتی دەگەیەنرێتە 79 ترلیۆن دینار
SNN
وەزارەتی پلاندانانی حکومەتی عێراق پلانی پێنج ساڵەی وەزارەتەکەی بۆ بەرزکردنەوەی داهاتی نانەوتی ئاشکرا دەکات و پێی وایە بە گرتنەبەری چەند ڕێکارێک داهاتی نانەوتی تا 2028 بگاتە 79 ترلیۆن دینار.
عەبدولزەهرە هنداوی، وتەبێژی وەزارەتی پلاندانانی عێراق بە رۆژنامەی سەباح-ی نیمچە فەرمی ڕاگەیاند: پێشبینیەكان ئاماژە بەوە دەکەن، کۆی داهاتی نانەوتی لە ماوەی پلانی پێنج ساڵەدا کە درێژدەبێتەوە بۆ ساڵی 2028 دەگاتە 79 ترلیۆن و 100 ملیار دینار، لەو ژمارەیەش 21 ترلیۆن باجی راستەوخۆ و 16 تریلیۆن و 800 ملیار دینار باجی ناڕاستەوخۆیە، لەکاتێکدا کۆی ئەو جۆرەی کە ماونەتەوە لە داهاتی نانەوتی پێشبینی دەکرێت 41 ترلیۆن و 300 ملیار دینار بێت.
وتیشی: “پلانی گەشەپێدانی نیشتمانی ئامانجی ئەوەیە ڕێژەی گەشەی ئابووری بە ڕێژەی 4.24 لەسەد بۆ بەرهەمی گشتیی ناوخۆ بەدەستبهێنێت، لەسەر بنەمای ئەوەی ئەم ڕێژەیە هاوتایە لەگەڵ توانا مرۆیی و ماددییە بەردەستەکان و ئاڵنگارییەكانی بەردەمی، بە لەبەرچاوگرتنی دۆخی نادڵنیایی و ئەدای چالاکییە ئابوورییەکان بۆ ماوەی پێشوو.
باسی لەوەشکردووە: لە پلانەكەدا گرنگی بە کەرتە سەرەکییەکانی وەک کشتوکاڵ و پیشەسازی و گەشتوگوزار دەدرێت، جگە لە چالاکییەکانی ژێرخانی خزمەتگوزاری بەپێی ئەوەی لە چوارچێوەی گشتی پلانەکەدا هاتووە.
