ژمارەی گیانلەدەستدان بە تای خوێنبەربوون بەرزبووەوە

SNN-

وەزارەتی تەندروستیی عێراق رایگەیاند، 8 حاڵەتی مردن و 54 حاڵەتی تووشبووی نەخۆشیی تای خوێنبەربوون لە عێراق تۆمار کراون، “زۆرترین مردن لە کەرکووک تۆمار کراوە.”

د. سەیف بەدر، وتەبێژی وەزارەتی تەندروستیی عێراق رایگەیاند، لە سەرەتای ئەم ساڵەوە 54 تووشبووی تای خوێنبەربوون لە عێراق تۆمار کراون، کە 8یان مردوون و زۆرترین تووشبوو لە پارێزگای زیقار تۆمار کراون، کە 17 تووشبووە، زۆرترین مردنیش لە کەرکووکە.

هاوکات، سامان یابە، وتەبێژی تەندروستیی کەرکووک، رایگەیاند، ئەم ساڵ لە کەرکووک 5 تووشبووی تای خوێنبەربوون تۆمار کراون، کە چواریان مردوون و ئەوەی دیکەش چاک بووەتەوە، هیچ تووشبوویەکی نوێش تۆمار نەکراوە.

پەتای تای خوێنبەربوون پەتایەکی ڤایرۆسییە، گواستراوەیە و بەهۆی ئاژەڵ و مێش و مەگەزەوە بۆ مرۆڤ دەگوازرێتەوە، کە لەنێوان مرۆڤەکانیشدا درمە و دەگوازرێتەوە.