وتەبێژی کۆشکی سپی: دۆناڵد ترەمپ هەفتەی داهاتوو سەردانی رۆژهەڵاتی ناوەڕاست دەکات

SNN-

کارۆلین لیڤیت، وتەبێژی کۆشکی سپی رایگەیاند، “سەرۆك ترەمپ چاوی لە گەڕانەوە مێژووییەکەیەتی بۆ رۆژهەڵاتی ناوەڕاست، هەفتەی داهاتوو سەردانی سعوودیە، قەتەر و ئیمارات دەکات و لەوێ سەرنجی لەسەر پتەوکردنی پەیوەندییەکانمان دەبێت.”

باسی لەوەشکردووە، هەشت ساڵ لەمەوبەر سەرۆك ترەمپ سەردانی ئەو ناوچەیەی جیهانی کرد و ستراتیژییەی ئاشتی لە ڕێی هێزەوە بۆ سیاسەتی دەرەوە پێشکەش کرد، هەروەها لەو گەشتەیدا سەرۆك ئامانجی خۆی بۆ لەناوبردنی تیر*ۆر و توندڕەوی لە ناوچەکە باس کرد کە لە ماوەی ئیدارەکەیدا بە تێکشکاندنی تەواوەتی دا*عش و واژۆکردنی رێککەوتنامەی ئیبراهیمی، بە سەرکەوتوویی ئامانجەکەی بەدەست هێنا.

وتەبێژی کۆشکی سپی وتیشی، “ئێستا و دوای هەشت ساڵ سەرۆك ترەمپ دەگەڕێتەوە ناوچەکە، تا جەخت لە دیدگای خۆی بۆ رۆژهەڵاتێکی ناوەڕاستی خۆشگوزەران و جێگەی شانازی سەرکەوتوو بکاتەوە، کە تێیدا ئەمەریکا و گەلانی وڵاتانی ڕۆژهەڵاتی ناوەڕاست لە پەیوەندییەکی هاریکاریدان و توندڕەوی تێکشکێندراوە و بازرگانی و ئاڵوگۆڕی کولتووری جێگرەوەی بێت.”